Májilis asa qaýipti aýrýlarǵa qatysty zertteýlerdi jetildirý týraly qujatty qabyldady

ASTANA. KAZINFORM – Búgin Májilistiń jalpy otyrysynda «Bıologııalyq materıalmen almasý týraly kelisimdi ratıfıkatsııalaý týraly» Zańy qabyldandy. 

Kelisimge 2022 jylǵy 20 mamyrda TMD elderiniń Úkimet basshylary keńesiniń otyrysynda qol qoıyldy.

«Kelisimdi ratıfıkatsııalaý TMD-ǵa múshe memleketterdiń janýarlardyń ınfektsııalyq aýrýlarynyń taralýyn boldyrmaý, asa qaýipti aýrýlardyń zerthanalyq dıagnostıkasyn jetildirý, mıkroorganızmderdiń (shtammdardyń) ulttyq kollektsııalaryn tolyqtyrý jáne osy Kelisimge qol qoıǵan memleketterdiń aýmaqtaryn epızootııalardan qorǵaý boıynsha kúsh-jigerin biriktirýge múmkindik beredi. Qujatta taraptardyń suraýy boıynsha epızootııalyq jaǵdaıdy jáne ǵylymı múddelerdi eskere otyryp, akkredıttelgen ári referenttik zerthanalarda bıologııalyq materıalǵa zertteýler jasaý qarastyrylǵan», - dedi Aýyl sharýashylyǵy vıtse-mınıstri Amanǵalı Berdalın.

Onyń aıtýynsha, bul kelisim Qazaqstan Respýblıkasynyń zańnamasyna, elimiz ratıfıkatsııalaǵan halyqaralyq sharttarǵa jáne Qazaqstan múshe sanalatyn halyqaralyq uıymdardyń sheshimderine sáıkes keledi.

«Zańdy qabyldaý teris áleýmettik-ekonomıkalyq jáne quqyqtyq saldarǵa ákep soqpaıdy, sondaı-aq respýblıkalyq bıýdjetten qosymsha qarjylyq shyǵyndardy qajet etpeıdi», - dedi vıtse-mınıstr.