Májilis AÓSShK tıimdiligin jaqsartýǵa arnalǵan qujatty qabyldady

ASTANA. KAZINFORM — Búgin Májilistiń jalpy otyrysynda «2007 jyldaǵy Qazaqstan Úkimeti men Azııadaǵy ózara is-qımyl jáne senim sharalary jónindegi keńestiń Hatshylyǵy arasyndaǵy Hatshylyqtyń Qazaqstannyń aýmaǵynda bolýy sharttary týraly kelisimge ózgerister engizý týraly hattamany ratıfıkatsııalaý týraly» Zańy qabyldandy.

Bul hattamǵa 2024 jylǵy 15 qarashada Astana qalasynda qol qoıyldy.

— Qazaqstan Respýblıkasy Azııadaǵy ózara is-qımyl jáne senim sharalary jónindegi keńestiń negizin qalaýshy memleket retinde uıymnyń jalpy qyzmetiniń, onyń ishinde atqarýshy organy — Hatshylyǵy jumysynyń tıimdiligin únemi jaqsartýǵa erekshe mán berip keledi. Osy zań jobasy Qazaqstan Prezıdenti Qasym-Jomart Toqaevtyń Azııa keńesiniń tolyqqandy halyqaralyq uıymǵa transformatsııalaý týraly bergen tapsyrmasyn iske asyrý maqsatynda ázirlendi. Hattamaǵa engizilgen ózgerister BUU-nyń jáne basqa da halyqaralyq uıymdardyń tájirıbesine sáıkes, Hatyshylyqqa jumysqa jiberiletin nemese kelisimshart negizinde qyzmet atqaratyn personal músheleriniń halyqaralyq mártebesin nyǵaıtýdy kózdeıdi, — dedi QR Syrtqy ister mınıstriniń birinshi orynbasary Aqan Rahmetýllın.

Onyń aıtýynsha, jalpy, Azııa keńesi Hatshylyǵynyń Qazaqstanda bolýy sharttary týraly kelisimge 32 ózgeris engizý qarastyrylǵan. Atap aıtqanda, olardyń 13-i Hatshylyq personalyna halyqaralyq azamattyq qyzmetshi fýnktsııalaryn berýge qatysty, al qalǵan 19-y redaktsııalyq túzetý sanalady.

— Qazirgi geosaıası týrbenttilik jaǵdaıynda Azııa keńesi ózin geografııalyq aýqymy men tetikteriniń negizinde burynǵydan da joǵary suranysqa ıe bolyp otyr. Osyǵan oraı qabyldatatyn zań qyzmetkerlerdiń eńbek jaǵdaılaryn halyqaralyq standarttarǵa jaqyndatyp, keńesti tolyqqandy halyqaralyq uıymǵa aınaldyrýǵa oń áser beredi jáne hatshylyq qyzmetiniń áleýetin odan ári arttyrady, — dedi mınıstriniń birinshi orynbasary.

Buǵan deıin AÓSShK-ge múshe elder qarjy salasyndaǵy yntymaqtastyqty nyǵaıta túsetinin jazǵan edik.