Májilis aqshany jylystatýǵa qarsy kúres týraly zań qabyldady

ASTANA. KAZINFORM — Qujatty Qarjylyq monıtorıng agenttigi tóraǵasynyń orynbasary Jeńis Elemesov tanystyrdy.

Májilis «Qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyl jónindegi Eýrazııalyq toptyń bıýdjetin qalyptastyrý jáne atqarý tártibi týraly erejege ózgerister engizý týraly hattamany ratıfıkatsııalaý týraly» zańdy qabyldady.

— 1989 jyly qurylǵan FATF (Financial Action Task Force on Money Laundering) aqshany jylystatýǵa jáne terrorızmge qarsy kúres salasyndaǵy halyqaralyq standarttardy belgileıdi. Bul standarttar BUU-ǵa múshe elderdiń bárine, onyń ishinde Qazaqstan úshin de mindetti. Sonymen qatar elder FATF túrinde qurylǵan toptyń birine qatysý kerek. 
Búgingi tańda osyndaı 9 aımaqtyq top qurylǵan. Sonyń ishinde Aqshany jylystatýǵa jáne terrorızmge qarsy kúres is-qımyl jónindegi eýrazııalyq topty 2004 jyly 6 el qurǵan. Qazaqstan solardyń qatarynda, — dedi ol.

Aıtýynsha, uıymnyń hatshylyǵy Máskeýde ornalasqan. 2011 jyly Eýrazııalyq top úkimetaralyq uıym mártebesine ıe bolyp, onyń quramy 9 elge deıin keńeıdi. Osy 9 memleketten basqa 17 memleket pen 24 halyqaralyq uıym baqylaýshy bolyp tirkelgen.

— 2012 jyly FATF mandaty qaıta keńeıtilip, jappaı qyryp-joıý qarýyn taratýdy qarjylandyrýǵa qarsy is-qımyl máseleleri qosyldy. Osyǵan baılanysty hattama men kelisim mátini tolyqtyryldy. Hattamada Eýrazııalyq toptyń bıýdjetiniń kózderi keńeıtildi. Qazir topqa múshe 9 memlekettiń jeteýi hattamany ratıfıkatsııalady. Osy ýaqytta Qazaqstan men Qytaı Halyq Respýblıkasy qujatty ratıfıkatsııalaý boıynsha ishki memlekettik rásimderin júrgizip jatyr. Hattamany ratıfıkatsııalaý respýblıkalyq bıýdjetten qosymsha shyǵyndardy qajet etpeıdi. Bul topqa múshe bolǵan 20 jyldyń ishinde Qazaqstan bir ret 300 myń rýbl kóleminde erikti jarna engizdi. Maqsattyq jarnalar naqty mindetter men maqsattarǵa ǵana tólenedi, — dedi Jeńis Elemesov.

Buǵan deıin Májilis Bıýdjet kodeksine Senat engizgen túzetýlermen keliskenin jazǵan edik.