Májilis Ákimshilik kodekske engiziletin túzetýlerdi maquldady
ASTANA. KAZINFORM – Májilis ákimshilik kodekske ózgerister men tolyqtyrýlar engizetin zań jobasyn birinshi oqylymda maquldady.
Zań jobasyn tanystyrǵan Ádilet mınıstri Azamat Esqaraev usynylyp otyrǵan túzetýler eki negizgi baǵytty qamtıtynyn aıtty. Birinshi baǵyt «qoǵamdyq jumystarǵa tartý» jazasyn reglamentteýdi kózdeıdi. Ekinshisi ákimshilik-delıktik zańnamany odan ári jetildirýge baǵyttalǵan.
«Zań jobasynda qoǵamdyq jumystardy 9 bap boıynsha qoldaný usynylady. Zań jobasynda qoǵamdyq jumystarǵa tartý jazasyn bylaısha iske asyrý usynylady. Qoǵamdyq jumystardyń túrlerin jáne qoǵamdyq jumys oryndalýǵa tıis uıymdardyń tizimin ákimdikter aıqyndaıdy. Sonymen qatar ákimdikter sot qaýlysy kelip túsken sátten bastap quqyq buzýshyny shaqyryp, jeke derekterin toltyrady; quqyqtary men mindetterin, qoǵamdyq jumysty oryndaý tártibin túsindiredi. Qoǵamdyq jumystardy oryndaý úshin adamdardy olarǵa jiberý týraly uıymǵa habarlama jiberedi. Qoǵamdyq jumystardy oryndaý kestesi men jıiligin belgileıdi. Jiberilgen adam qoǵamdyq jumystardy oryndaýdan jaltarǵan jaǵdaıda ol týraly ishki ister organdaryna habardar etedi. Óz kezeginde uıymdar oryndalǵan jumystardyń aktilerin jasap, jumys istelgen saǵattardyń tabelin júrgizedi; jumystardyń oryndalǵany týraly jergilikti atqarýshy organdarǵa esep beredi», - dedi ol.
Sondaı-aq, ol aıyppul, ruqsattan aıyrý, ruqsatty ýaqytsha toqtatý sııaqty sharalardy sot quzyrynan ýákiletti organdarǵa berý usynylatynyn aıtty.
«Quqyq buzýshylyq alǵash ret jasalǵan kezde mundaı isterdi ýákiletti organdardyń ózderi qaraıdy.
Biraq tyıym salý, múlikti tárkileý, arnaıy quqyqtan aıyrý, sheteldik azamatty respýblıkadan tys jerlerge shyǵaryp jiberý jáne májbúrlep buzý sanktsııalary kózdelgen ister sottardyń qaraýynda qalady.
Búgingi kúni 60-tan astam quramdy sot quzyrynan memlekettik organdardyń vedomstvosyna berý usynylady», - dedi ol.
Májilis depýtattary zań jobasyn birinshi oqylymda maquldaý týraly sheshim qabyldady.
