Májilis ákimshilik ádilet salasyn jetildiretin zańdy qabyldady
ASTANA. KAZINFORM – Májilis «Qazaqstan Respýblıkasynyń keıbir zańnamalyq aktilerine ákimshilik ádilet salasyn jetildirý jáne keńeıtý máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańyn qabyldady.
Qujat boıynsha negizgi baıandama jasaǵan depýtat marat Báshimovtyń aıtýynsha, 2021 jylǵy 1 shildeden bastap elimizde ákimshilik ádilet ınstıtýty jumys isteıdi. Ol bir taraby memlekettik organ bolatyn jarııa-quqyqtyq daýlarda azamattardyń quqyqtaryn sottyq qorǵaýdyń jańa formaty sanalady. Ákimshilik ádilettiń engizilýi Memleket basshysy bastamashylyq etken sot-quqyqtyq reformanyń basty qadamyna aınaldy jáne memlekettik organ men azamattyń sot protsesinde teń quqyqty qatysýshylar bolýyna negizdelgen jańa modelge kóshýdi bildirdi.
- Buǵan deıin mundaı daýlar jalpy ıýrısdıktsııa sottarynda Azamattyq is júrgizý kodeksiniń normalary boıynsha qaralyp keldi. Bul kóbine taraptardyń teńsizdigine ákeldi. Ákimshilik ádilet osy teńsizdikti joıyp, dáleldeý mindetin memlekettik organǵa júktedi jáne sottyń belsendi rólin qamtamasyz etti. Endi sot óz bastamasymen qajetti dáleldemelerdi suratýǵa quqyly, - dedi Marat Báshimov.
Onyń atap ótýinshe, zań jobasyn qaraý barysynda normashyǵarmashylyq qyzmetti ǵylymı súıemeldeýge qatysty normalar engizildi. Bul zań shyǵarý protsesinde quqyqtyq ǵylymnyń rólin kúsheıtip, quqyqtyq aktilerdiń sapasyn arttyrýǵa múmkindik beredi.
- Atalǵan zań jobasyn qabyldaý ákimshilik rásimderdiń tıimdiligin arttyrýǵa, isterdi ádil qaraý quqyǵyn qamtamasyz etý arqyly azamattardyń quqyqtaryn nyǵaıtýǵa, sondaı-aq quqyqtyq memlekettiń mańyzdy elementi bolyp tabylatyn ákimshilik ádiletti odan ári damytýǵa yqpal etetin bolady, - dedi ol.
Májilis depýtattary atalǵan zańdy Senat qaraýyna jiberdi.
Aıta keteıik, Májilis taqtatas munaıyn óndirýdi yntalandyratyn zańdy qabyldady.