Májilis 2024 jyldyń naqtylanǵan bıýdjetin talqylaıdy

ASTANA. KAZINFORM – Parlament Májilisiniń qaraýyna «2024-2026 jyldarǵa arnalǵan respýblıkalyq bıýdjet týraly» Zańǵa ózgerister men tolyqtyrýlar engizý týraly» zań jobasy kelip tústi.

«Zań jobasy eki negizgi baǵyt boıynsha respýblıkalyq bıýdjet kórsetkishteriniń ózgerýine baılanysty ázirlendi. Birinshiden, 2024 jylǵa arnalǵan kiristerdiń naqtylanǵan boljamy bekitilgen jospardan 2 trln teńgege tómendeýmen aıqyndaldy. Bul rette, Ulttyq qordan maqsatty transfert túrinde qosymsha 2 trln teńge tartý josparlanǵan», - dedi depýtat Tatıana Saveleva Májilistiń jalpy otyrysynda.

Onyń aıtýynsha, shyǵystar men bıýdjet tapshylyǵynyń parametrleri Úkimet júrgizgen bıýdjettik túzetýlerdi eskere otyryp ózgertilgen. Bul turǵyda 2023 jylǵa arnalǵan bıýdjet qarajatynyń 61,3 mlrd teńge somasyndaǵy qaldyǵy paıdalanylmaq.

Osyny eskere otyryp, respýblıkalyq bıýdjettiń naqtylanǵan shyǵystary bekitilgen kórsetkishke qatysty 61,3 mlrd teńgege ósedi dep eskerilgen. Sondaı-aq 2024 jyldaǵy respýblıkalyq bıýdjettiń tapshylyǵy 3,6 trln teńgeni quraıdy.

Bıyl qazan aıynda Májilis spıkeri Erlan Qoshanov Úkimettiń Ulttyq qor qarajatyn jumsaýyn synǵa aldy. https://kaz.inform.kz/news/ulttik-kor-karazhatin-paydalanu-praktikasin-dogaru-kazhet-mazhls-toragasi-65c919/

Ulttyq bank tóraǵasy Tımýr Súleımenov Ulttyq qordyń túsimi men alymynda keri balans qalyptasqanyn másele etip kóterdi. 

Úkimet 2030 jylǵa qaraı Ulttyq qordyń valıýtalyq aktıvterin 100 mlrd dollarǵa deıin jetkizýdi josparlap otyr.