Májilis 1 shildege deıin jumys isteıdi: sarapshy sholýy
ASTANA. KAZINFORM – Májilistiń qazirgi quramy bıylǵy 1 shildege deıin jumysyn jalǵastyrady. Budan keıin Parlament taratylyp, Memleket basshysy jańa saılaý taǵaıyndaý týraly jarlyqqa qol qoıady. Bul týraly «Jibek Joly» telearnasyndaǵy «Taldaý» saıası jobasynda saıasattanýshy Ǵazız Ábishev málimdedi.
Sarapshynyń aıtýynsha, 2023 jyldyń naýryzynda saılanǵan depýtattar osy ýaqyt aralyǵynda aýqymdy zań jobalaryn qarap úlgergen. Máselen memlekettik organdarǵa 1,5 myńnan astam depýtattyq saýal joldanyp, oǵan 1,7 myńnan astam jaýap alynǵan.
– Depýtattardyń saýaldary el ekonomıkasy men syrtqy saıasattan bastap, quqyqtyq tártip pen basqa da mańyzdy salalardy qamtydy. Sonymen qatar Parlament qoǵamda úlken talqylaý týdyrǵan birqatar zańdy ázirlep, qabyldady, – dedi baǵdarlama júrgizýshisi.
Eń mańyzdy qujattardyń biri – zańsyz ıemdenilgen aktıvterdi memleketke qaıtarý týraly zań. Prezıdent bul qujatqa 2023 jylǵy 12 shildede qol qoıdy. Bul zań «Ádiletti Qazaqstan» tujyrymdamasyn iske asyrýdyń negizgi quralyna aınaldy.
2026 jyldyń naýryz aıyndaǵy derek boıynsha, memleketke 1 trıllıon teńgeden astam qarajat qaıtaryldy. Onyń ishinde qolma-qol aqshamen qatar jyljymaıtyn múlik pen jer telimderi de bar.
– Aktıvterdi qaıtarý týraly zań ótken onjyldyqtardaǵy kúmándi isterdi retke keltirýge múmkindik berdi. Shyndyǵyna kelgende, bunyń barlyǵy zańsyz jolmen tabylǵan múlikke qatysty ádildikti ornatý degen sóz, – dep atap ótti sarapshy.
Áleýmettik mańyzy bar bastamalardyń qatarynda 2024 jyly qabyldanǵan turmystyq zorlyq-zombylyq úshin jaýapkershilikti kúsheıtý týraly zań bar. Qujat uryp-soǵý men densaýlyqqa jeńil zııan keltirýdi qaıtadan qylmystyq salaǵa jatqyzyp, zardap shekkenderdi qorǵaý kúsheıtildi.
Sonymen qatar adamdy nekege turýǵa májbúrleýge qarsy zań qabyldandy. Endi qyz alyp qashý nemese bopsalaý arqyly nekege ıtermeleý úshin qylmystyq jaza qarastyrylǵan.
– Bul eki zań buryn nazardan tys qalyp kelgen jaǵymsyz áleýmettik qubylystarǵa tosqaýyl qoıdy. Memleket azamattardyń quqyǵyn qorǵaý máselesinde óz ustanymyn bildirdi, – delingen baǵdarlamada.
2024 jyly qumar oıyndarǵa táýeldilikpen kúres týraly zań qabyldanyp, oıynǵa qatysý jasy 21-ge deıin kóterildi.
Al 2025 jyly qabyldanǵan jańa Salyq kodeksi bıylǵy 1 qańtardan bastap kúshine endi. Bul qujat munaı tabysy azaıǵan tusta el ekonomıkasyn turaqtandyrý úshin qajet bolǵan.
Sarapshylardyń paıymdaýynsha, qazirgi Májilistiń jumysy elimizdiń zańnamasyn júıeli túrde jańartyp, áleýmettik-ekonomıkalyq saıasattyń jańa baǵyttaryn qalyptastyrýǵa negiz boldy.
Aıta keteıik, Májilis depýtaty Nurtaı Sabılıanov bir palataly Parlament zań sapasyna oń áser etetin aıtqan bolatyn.