Májilistiń jumys toby ishki ister organdary týraly zań jobasyn talqylady
ASTANA. 14 naýryz. QazAqparat - Búgin Parlament Májilisinde «Qazaqstan Respýblıkasynyń ishki ister organdary týraly» jańa redaktsııadaǵy zań jobasy jumys toby aıasynda talqylandy. Májilis depýtaty Nurlan Ábdirov jetekshilik etetin jumys tobynyń aıasynda depýtattar saýalyna Іshki ister mınıstriniń orynbasary Erlik Kenenbaev jaýap berdi.
Eske salsaq, ishki ister organdarynyń qyzmetine qatysty qoldanystaǵy zań osydan 17 jyl buryn qabyldanǵan bolatyn. Soǵan oraı, usynylǵan jańa zań jobasy 9 taraý men 32 baptan turady. Jumys tobynyń jetekshisi, Májilis depýtaty Nurlan Ábdirovtiń aıtýynsha, zań jobasyn ázirleý barysynda Memleket basshysynyń «Jańa onjyldyq - jańa ekonomıkalyq órleý - Qazaqstannyń jańa múmkindikteri» atty 2010 jylǵy 29 qańtardaǵy Qazaqstan halqyna Joldaýynda júktelgen mindetter qamtylǵan. «Sonymen qatar, qalyptasqan Qazaqstan Respýblıkasyn jańǵyrtýdyń qaǵıdattary men tásilderi, quqyq qorǵaý salasynda júzege asyrylyp jatqan qaıta uıymdastyrýlar, ǵylym jetistikteri, polıtsııa ınstıtýttarynyń jumys isteýiniń otandyq jáne sheteldik tájirıbeleri eskerilgen»,- dedi depýtat N. Ábdirov.
Jalpy, zań jobasynda tuńǵysh ret ishki ister qyzmetkerleriniń is júzinde atqaratyn jumysy engizilip otyr. Atap aıtqanda ishki ister organdarynyń mindetterin ózgertip, azamattardy qorǵaý, onyń ómiri, quqyǵy men bostandyǵy, sonymen qatar qoǵam men memlekettiń zańdy múddelerin qorǵaý máselesi birinshi orynǵa shyǵyp otyr. Qoldanystaǵy zańda mundaı mindet kórsetilmegen.
Zań jobasynyń túsindirme jazbasyna qaraǵanda, ishki ister organdary qyzmetkerleriniń qarýdy eskertýsiz qoldaný quqyǵy eger olardyń ómirine tikeleı qaýip tóngen jaǵdaılarda qarastyrylady. Jobadaǵy jańa normalarǵa sáıkes, bundaı jaǵdaıda ishki ister qyzmetkerlerine atys qarýymen qosa gaz qarýyn, elektrlik qarýdy, sýyq qarýdy, temir jáne laqtyratyn qarýdy qoldanýǵa quqyq berilýi múmkin. Budan bólek, zań jobasyna sáıkes, Qazaqstanda travmatıkalyq qarý túrleri 2014-2016 jyldary aınalystan alynatyndyǵy kórsetilgen. Qujatta sondaı-aq, quqyq qorǵaý organdarynyń qarý satyp alý quqyǵy bekitiledi, qajet bolǵan jaǵdaıda qarýdyń basqa da túrlerin paıdalaný quqyǵy beriledi. Sonymen qatar, munaıgaz jáne atom salasynda jumys isteıtin ulttyq kompanııalardyń kúzet mekemelerine uzyn uńǵyly nemese qysqa uńǵyly qarý satyp alýǵa jáne paıdalanýǵa ruqsat etiledi. Bul baǵyttaǵy arnaıy normalar «Kúzet qyzmeti týraly» zańyna ózgerister engizý arqyly júzege asyrylatyn bolady.
