Májilistiń jalpy otyrysynyń kún tártibiniń jobasy qalyptastyryldy
ASTANA. 10 jeltoqsan. QazAqparat - Búgin QR Parlamenti Májilisiniń Tóraǵasy Oral Muhamedjanovtyń jetekshiligimen Palata Bıýrosynyń kezekti otyrysy ótti.
Onda Májilistiń salalyq komıtetteriniń usynýymen sársenbi kúni ótetin jalpy otyrystyń kún tártibine usynylatyn máseleler qaraldy.
Ekonomıkalyq reforma jáne óńirlik damý komıteti eki zań jobasyn depýtattar talqysyna shyǵarýdy usyndy. Atap aıtqanda, «Qazaqstan Respýblıkasynyń keıbir zańnamalyq aktilerine ýákiletti memlekettik organdar men Qazaqstan Respýblıkasy Úkimetiniń tekseriletin sýbektilerge qoıylatyn talaptardy belgileıtin normatıvtik quqyqtyq aktilerdi qabyldaý quzyretterin qaıta qaraý máseleleri boıynsha ózgerister men tolyqtyrýlar engizý týraly» jáne «Qazaqstan Respýblıkasynyń keıbir zańnamalyq aktilerine ruqsat berý júıesin jetildirý máseleleri boıynsha ózgerister men tolyqtyrýlar engizý týraly» zań jobalary birinshi oqylymda talqyǵa túsedi.
Sondaı-aq depýtattardyń talqysyna halyqaralyq mańyzǵa ıe zań jobasy usynylatyn boldy. Halyqaralyq ister, qorǵanys jáne qaýipsizdik komıtetiniń usynýymen «Qazaqstan Respýblıkasynyń Úkimeti men Ispanııa Koroldiginiń Úkimeti arasyndaǵy Tabys pen kapıtalǵa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly konventsııany jáne oǵan Hattamany ratıfıkatsııalaý týraly» jáne «Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy Ǵarysh keńistigin beıbit maqsattarda zertteý jáne paıdalaný salasyndaǵy yntymaqtastyq týraly kelisimdi ratıfıkatsııalaý týraly» zań jobalary Palatanyń jalpy otyrysynyń kún tártibine engiziledi.
Zańnama jáne sot-quqyqtyq reforma komıteti «Medıatsııa týraly» zań jobasy jáne soǵan sáıkes keıbir zańdarǵa engiziletin túzetýler ekinshi oqylymǵa daıyn ekenin málim etti.
Sonymen birge Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine salyq salý máseleleri boıynsha ózgerister men tolyqtyrýlar engizý týraly» zań jobasy boıynsha qorytyndy shyǵarý ýaqyty belgilenetin bolady.
