Májilistiń jalpy otyrysynyń kún tártibi qalyptastyryldy
ASTANA. 4 qarasha. QazAqparat - Búgin QR Parlamenti Májilisiniń Tóraǵasy Oral Muhamedjanovtyń jetekshiligimen Palata Bıýrosynyń otyrysy ótti. Onda aldaǵy aptada Májilistiń jalpy otyrysyna shyǵarylatyn máseleler sarapqa salyndy, dep habarlaıdy Májilistiń Baspasóz qyzmeti.
Ekonomıkalyq reforma jáne óńirlik damý komıteti «Indýstrııalyq-ınnovatsııalyq qyzmetti memlekettik qoldaý týraly» jáne soǵan sáıkes ilespe zań jobasyn birinshi oqylymda qaraýdy usyndy.
Halyqaralyq ister, qorǵanys jáne qaýipsizdik komıtetiniń usynysymen «Materıaldyq emes mádenı murany qorǵaý týraly konventsııany ratıfıkatsııalaý týraly» zań jobasy jalpy otyrystyń kún tártibine engiziletin boldy.
Palatanyń Zańnama jáne sot-quqyqtyq reforma «Qazaqstan Respýblıkasynyń keıbir zańnamalyq aktilerine zııatkerlik menshik máseleleri boıynsha ózgerister men tolyqtyrýlar engizý týraly» zań jobasynyń ekinshi oqylymda depýtattar talqysyna shyǵarylatynyn habarlady.
Qarjy jáne bıýdjet komıteti «Qazaqstan Respýblıkasynyń keıbir zańnamalyq aktilerine jobalyq qarjylandyrý máseleleri boıynsha ózgerister men tolyqtyrýlar engizý týraly» zań jobasymen jumysty jalǵastyrý jóninde usynys bildirdi.
Úkimetten Májiliske kelip túsken «Qarjylandyrý týraly negizdemelik kelisimdi (QAZ: OAÓEY 2 kólik dálizi (Mańǵystaý oblysynyń ýchaskeleri) ınvestıtsııalyq baǵdarlamasy) ratıfıkatsııalaý týraly», «Taýar tańbalary jónindegi zańdar týraly Sıngapýr shartyn jáne Taýar tańbalary jónindegi zańdar týraly Sıngapýr shartyna nusqaýlyqty ratıfıkatsııalaý týraly» jańa zań jobalary boıynsha qorytyndy ázirleý máselesi qaralatyn boldy.
Bıýro otyrysynda Májilistiń zań shyǵarmashylyq isine qatysty basqa da máseleler qaraldy.
