Májilistiń jalpy otyrysynda kedendik retteý máselesi qaralady

ASTANA. QazAqparat - Májilis Spıkeri Nurlan Nyǵmatýlınniń tóraǵalyǵymen Májilistiń Bıýro otyrysy ótip, onda aldaǵy jalpy otyrystyń kún tártibi talqylandy, dep habarlaıdy QazAqparat.

Osy oraıda aldaǵy sársenbide Májilis Kedendik retteý týraly Kodeks jobasyn jáne oǵan ilespe zań jobasyn birinshi oqylymda qaraıdy dep kútilýde.

«Ol EýrazEO Keden Kodeksiniń kedendik retteý salasyndaǵy jańalyqtaryn reglamentteýdi  kózdeıdi. Onyń ishinde elektrondyq kedendik deklaratsııalaýdyń basymdyǵy jáne belgili bir jaǵdaılarda ǵana jazbasha deklaratsııalaýdy qoldaný, deklaratsııany toltyrýǵa negiz bolǵan qujattardy keden organyna usynbaı, kedendik deklaratsııany berý taǵy basqa da máseleler qamtylǵan», - dep atap ótilgen QR Parlamenti Májilisi apparaty baspasóz qyzmetiniń málimetinde.

Sonymen qatar, osy kúni Palata Eýrazııalyq ekonomıkalyq odaqtyń Keden kodeksi týraly shartty ratıfıkatsııalaýǵa baılanysty zań jobasyn qaraıdy dep kútilýde.