Májilistiń jalpy otyrysynda birqatar zań jobalary talqyǵa shyǵarylady
ASTANA. 28 maýsym. QazAqparat - Erteń, 29 maýsym kúni, Májilistiń jalpy otyrysy ótedi, dep habarlaıdy Májilistiń baspasóz qyzmeti.
Kún tártibine sáıkes depýtattardyń talqysyna «Qazaqstan Respýblıkasynyń keıbir zańnamalyq aktilerine asyl tuqymdy mal sharýashylyǵy máseleleri boıynsha ózgerister men tolyqtyrýlar engizý týraly» zań jobasy ekinshi oqylymda usynylady. Bul jobanyń ekinshi oqylymǵa daıyndalýy týraly Májilistiń Agrarlyq máseleler komıtetiniń múshesi Petr Dmıtrıenko baıandama jasaıdy dep kútilýde.
Al Ekonomıkalyq reforma jáne óńirlik damý komıtetiniń múshesi Amanǵos Ótegenov pen Qarjy jáne bıýdjet komıtetiniń múshesi Baýyrjan Smaılov tıisinshe turǵyn úı qatynastary jáne ıslamdyq qarjylandyrýdy uıymdastyrý máselelerin qarastaratyn zań jobasyna Senat engizgen ózgerister jóninde baıandap beredi.
Palata depýtattary «2001 jylǵy 16 qarashadaǵy Qazaqstan Respýblıkasynyń Úkimeti jáne Ózbekstan Respýblıkasynyń Úkimeti arasyndaǵy Qazaqstan-ózbek memlekettik shekarasy arqyly ótkizý pýnktteri týraly kelisimge Hattamany ratıfıkatsııalaý týraly» zań jobasyn talqyǵa salady. Atalǵan qujattyń maqsaty týraly Qazaqstan Respýblıkasy Ulttyq qaýipsizdik komıteti Tóraǵasynyń orynbasary - Shekara qyzmetiniń dırektory Nurjan Myrzalıev baıandama jasaıtyny kózdelgen. Halyqaralyq ister, qorǵanys jáne qaýipsizdik komıtetiniń múshesi Ýálıhan Qońyrbaev qosymsha túsinik beredi.
Jalpy otyrystyń kún tártibine basqa da máseleler engizilgen.
