Májilistiń uıymdastyrýymen Marat Ospanovty eske alýǵa arnalǵan shaǵyn fýtboldan jarys ótýde
ASTANA. Qyrkúıektiń 30-y. QazAqparat - Qyrkúıektiń 29-y kúni «Alataý» sport kesheninde shaǵyn fýtboldan jarys bastaldy.
Bul týrnırge Parlament, Prezıdent Ákimshiligi, Úkimet Keńsesi, «Nur-Otan» HDP jáne «Habar» agenttigi, «Egemen Qazaqstan» gazetiniń komandalary qatysýda. Jeńimpaz komanda búgin anyqtalady.
Bul fýtbol týrnıri QR Parlamenti Májilisiniń birinshi shaqyrylymynyń tóraǵasy, memleket jáne qoǵam qaıratkeri, ǵalym-ekonomıst Marat Turdybekuly Ospanovty eske alýǵa arnalǵan.
Osy sharanyń ashylý saltanatynda sóz sóılegen QR Parlamenti Májilisi Tóraǵasynyń orynbasary Vladımır Bobrov salaýatty ómir saltyn ustanýda mundaı týrnırlerdiń mańyzdylyǵy zor ekenin aıtty. Jáne de tanymal qoǵam qaıratkeri Marat Ospanovtyń qurmetine arnalǵan jarys jyl saıyn dástúrli túrde ótip kele jatqanyn atap ótti.
Marat Ospanovtyń uly Arsen dop teýip, oıyndy bastap berdi. Alǵashqy kezdesý Prezıdent Ákimshiligi men «Nur-Otan» partııasy komandalary arasynda ótti. Bul oıynda Prezıdent Ákimshiliginiń aıaqdopshylary jeńiske jetti.
Kelesi kezekte Parlament pen «Egemen Qazaqstan» gazetiniń komandalary synǵa tústi. Esepti egemendikter ashqanmen, qorytyndy nátıje parlamentshilerdiń jeńisimen aıaqtaldy.
Budan keıin alańǵa shyqqan Prezıdent Ákimshiligi men «Habar» agenttigi oıynshylary arasyndaǵy tartysty kezdesýde Prezıdent Ákimshiliginiń komandasy jeńiske jetti. Al kelesi kezekte Parlament komandasy men Úkimet Keńsesiniń oıyny zań shyǵarý organynyń sál basymdylyǵymen aıaqtaldy.
Jarys qorytyndysynda jeńimpaz komandalarǵa Kýbok pen dıplomdar tabys etiledi. Jankúıerlerdiń yqylasyna bólengen oıynshylar da marapattarǵa ıe bolmaq.
