Májilistiń salalyq komıteti Almaty oblysynda kóshpeli otyrysyn ótkizýde
ASTANA. 2 maýsym. QazAqparat - Májilistiń Halyqaralyq ister, qorǵanys jáne qaýipsizdik komıteti maýsymnyń 1-i men 3-i aralyǵynda Almaty oblysynda kóshpeli otyrysyn ótkizýde.
Keshe tústen keıin attanǵan komıtet músheleri issapar barysynda áskerı bólimniń, keden beketteriniń qyzmetimen, Memlekettik shekarany jaılastyrý isimen tanysady. Almaty oblysynyń áleýmettik-ekonomıkalyq jaǵdaıyn zerdeleý maqsatynda óńir jáne aýdandar basshylarymen kezdesýler ótetini kózdelgen.
Áskerı qyzmetshiler men olardyń otbasy músheleriniń áleýmettik deńgeıin, sondaı-aq qyzmet óteýdiń áleýmettik-turmystyq jaǵdaıymen tanysý úshin jekelegen áskerı bólimderdiń jetekshilerimen jáne de Qazaqstan Respýblıkasy Ulttyq Qaýipsizdik Komıtetiniń Shekara qyzmetiniń áskerı qyzmetshilerimen, azamattyq qyzmetshilerimen kezdesý ótetini josparlanǵan.
Parlamentshiler «Qorǵas» Halyqaralyq shekaralyq yntymaqtastyq ortalyǵy qurylysynyń barysymen tanysý maqsatynda atalǵan kentke barady.
Komıtettiń kóshpeli otyrysy Qazaqstan Respýblıkasy Parlamenti Májilisiniń tórtinshi shaqyrylymnyń tórtinshi sessııasyna arnalǵan negizgi is-sharalar josparyna sáıkes ótkizilip otyr.
