Májilistiń Palata bıýrosy ótti

ASTANA. QazAqparat - Búgin Májilis Spıkeri Erlan Qoshanovtyń tóraǵalyǵymen Palata bıýrosy ótip, onda aldaǵy jalpy otyrystyń kún tártibi naqtylandy. Bul týraly QazAqparat Májiliske silteme jasap habarlaıdy.

Depýtattardyń talqylaýyna birinshi oqylymda Ákimshilik quqyq buzýshylyq týraly kodekske jerlerdiń paıdalanylýy men qorǵalýyn memlekettik baqylaý máseleleri boıynsha ózgerister men tolyqtyrý engizý týraly zań jobasy usynylady.

Tıisti zań jobasynda jer zańnamasynyń jekelegen normalaryn buzǵany úshin ákimshilik jaýapkershilik belgileý jáne jerdiń paıdalanylýy men qorǵalýyna memlekettik baqylaýdy júzege asyratyn organdarǵa ákimshilik isterdi qaraý jáne tıisti jaza qoldaný ókilettikterin berý kózdelgen.

Sonymen qatar kún tártibiniń jobasynda Eýrazııalyq ekonomıkalyq odaqqa múshe memleketter bıýdjetteriniń kirisine aýdarý tártibin saqtaý máseleleri boıynsha birlesken baqylaý is-sharalaryn ótkizý týraly kelisimdi ratıfıkatsııalaý týraly zań jobasy bar.

Aldaǵy jalpy otyrysta depýtattar birqatar zań jobasyn jumysqa alady. Olar: Ákimshilik quqyq buzýshylyq týraly kodekske túzetýler, ekologııalyq taza kólikti tanymal etý jáne elektromobılderge arnalǵan ınfraqurylymdy damytý máseleleri týraly jáne rezervtegi qyzmet máseleleri týraly zań jobalary.

Foto: parlam.kz