Májilistiń qoǵamdyq palatasy dinı birlestikter jónindegi málimetter bazasyn qurý qajet dep esepteıdi
ASTANA. 14 qyrkúıek. QazAqparat /Aıdar Ospanalıev/ - Parlament Májilisiniń qoǵamdyq palatasynyń ókilderi elimizde dinı birlestikter jónindegi málimetter bazasyn qurý qajet dep esepteıdi. Qoǵamdyq palatanyń «Dinı qyzmet jáne dinı birlestikter týraly» jáne «Qazaqstan Respýblıkasynyń keıbir zańnamalyq aktilerine dinı qyzmet jáne dinı birlestikter týraly ózgerister men tolyqtyrýlar engizý týraly» zań jobalaryn talqylaýdan soń jasalǵan qorytyndysynda kórsetilgen.
Esterińizge sala keteıik, Májilistiń qoǵamdyq palatasynyń otyrysy búgin L.N.Gýmılev atyndaǵy Eýrazııa Ulttyq ýnıversıtetinde ótip, atalmysh sharaǵa Parlament depýtattary, memlekettik organdar men din salasynyń ókilderi qatysty. Qorytyndyda sonymen qatar Qazaqstanǵa ákelingen dinı materıaldarǵa mindetti túrde taldaý júrgizý, dinı uıymdarmen baılanysty jumys isteıtin memlekettik organ ókilderiniń dinı saýatyn arttyrý, dinı nanym senim bostandyǵynyń qorǵaý tetikterin nyǵaıtý sııaqty birqatar máseleler qarastyrylǵan.
