Májilistiń qazirgi depýtattary Nur Otan praımerızinde jeńiske jetti

NUR-SULTAN. QazAqparat - Májilis depýtattary – «Nur Otan» partııasy fraktsııasynyń músheleri Gúlnar Bıjanova, Qudaıbergen Erjan, Balaıym Kesebaeva, Berik Ospanov jáne Artýr Platonov praımerız sheńberinde aımaqtardaǵy partııa konferentsııalarda pikirtalastarǵa qatysyp, eń kóp daýys jınady, dep habarlaıdy QazAqparat.

Májilis baspasóz qyzmetiniń málimetinshe, aımaqtarda partııa konferentsııalary ótip, Májiliske partııalyq tizim boıynsha úmitkerler arasynda pikirtalas uıymdastyryldy. Olardyń qatarynda ózekti baǵyttar boıynsha jumysyn jalǵastyrý úshin kandıdatýrasyn usynǵan Májilistiń qazirgi depýtattary da bar.

Atap aıtqanda, Artýr Platonov Almatydaǵy áleýmettik máselelerdi sheshý jáne ekologııany jaqsartý jónindegi ıdeıasyn usynsa, Berik Ospanov Shymkent qalasynda agroónerkásiptik keshendi damytý jáne otandyq kásipkerlerdi qoldaý máselesin kóterdi. Gúlnar Bıjanova men Balaıym Kesebaeva Májilistiń Zańnama jáne sot-quqyqtyq reforma komıtetiniń múshesi retinde Qaraǵandy jáne Qyzylorda oblystarynda sóz sóılep, qazaqstandyqtardyń ózekti máselelerin sheshý úshin zańnamany jetildirý taqyrybyn qozǵady. Sonymen qatar Qudaıbergen Erjan Túrkistan oblysynda eldiń qaýipsizdigin jaqsartý úshin tıimdi dıalog quryp, sanaly sheshim qabyldaý qajettiligine nazar aýdardy.

Pikirtalas barysynda Májilistiń qazirgi depýtattary ózderiniń zańnamalyq jumysynyń tájirıbesin, halyqtyń ómir súrý jaǵdaıy men otandyq ekonomıka salalarynyń ózekti máselelerin tereń biletinderin kórsetip, qandaı da bir saladaǵy jaǵdaıdy jaqsartý jáne jalpy óńirlerdi damytýǵa arnalǵan naqty usynys aıtty. Sondaı-aq, olar mańyzdy taqyryptar boıynsha syndarly baılanys qura biletindigin kórsetti.

Pikirsaıys qorytyndysy boıynsha Májilistiń qazirgi depýtattary eń kóp daýys jınap, óz óńirlerinen partııalyq tizimge endi.