Májilistiń qaıta qurylǵany qajet - depýtat R.Kım

ASTANA. QazAqparat - Parlamenti Májilisi men barlyq deńgeılerdegi máslıhat depýtattarynyń kezekten tys saılaýy Qazaqstannyń zań shyǵarý úderisine jańa serpin ákeledi, dep esepteıdi QR Parlamenti Májilisiniń depýtaty Roman Kım.

«Parlament depýtattarynyń aýqymdy reformalarǵa qatysty jumysyn bastap ketse, keıin saılaý barysynda olar oryndaryn bosatyp jatsa, menińshe, bul durys emes bolar edi. Olardyń memlekettik jumystarynyń jalǵasy úziledi. Sebebi qazirgi Parlament quramy ony bastady, al onyń jalǵasyn basqa quram jalǵastyrady. Sondyqtan Qazaqstan halqy Assambleıasy atynan túsken depýtattar atalmysh bastamany qoldady», - dep atap ótti ol depýtattardyń kezekten tys májilis saılaýyn ótkizý jónindegi bastamasyna qatysty.

R. Kımniń oıynsha, Májilistiń qaıta qurylǵany jáne túbegeıli jańarǵany qajet.

«Biz reformalardyń zańnamalyq negizin qalap berdik. Endi onyń praktıkalyq oryndalýyna jańa kózqarasqa, ádisterge ıe jańa quram aralasýy tıis. Bul, menińshe, durys bolady», - deıdi depýtat.

Sonymen qatar, onyń sózi boıynsha, depýtattardyń QR Parlamenti Májilisiniń jáne túrli deńgeılerdegi máslıhattyń saılaýyn birge ótkizý ıdeıasy durys bastama. Bul shara 2016 jyly ótetin saılaý naýqanynyń shyǵyndaryn birshama kemitedi.

«Árbir teńgeni saqtaýymyz kerek. Eń aldymen Májiliste, keıin máslıhat deńgeıinde depýtat saılaýyn ótkizetin bolsaq, bıýdjetke shyǵyn keledi. Bul bir jaǵynan ýaqytty shyǵyndaıdy, ekinshiden qosymsha qarajatty talap etedi. Sondyqtan, meniń pikirimshe, saılaýdy birge ótkizgen jón», - dep túıdi sózin R.Kım.