Májilistiń bıýro otyrysynda zań jobalarynyń daıyndyǵy pysyqtaldy

Qarjy jáne bıýdjet komıteti elimizdiń keıbir zańdaryna bıýdjet protsesinde memlekettik jáne bıýdjettik josparlaý jónindegi ýákiletti organdar kuzyretiniń arajigin ajyratý máseleleri boıynsha túzetýler engizýdi kózdeıtin zań jobasyn birinshi oqylymda qaraýǵa shyǵarýdy usyndy.

Zańnama jáne sot-quqyqtyq reforma komıteti elimizdiń keıbir zańnamalyq aktilerine halyqqa qyzmet kórsetý ortalyqtarynyń máseleleri boıynsha ózgerister engizýdi qarastyratyn zań jobasy depýtattar talqysyna shyǵarýǵa daıyn ekenin málimdedi.

Palatanyń Halyqaralyq ister, qorǵanys jáne qaýipsizdik komıteti birneshe zań jobasyn usyndy. Atap aıtqanda, Qazaqstan men Koreıa úkimetteri arasyndaǵy Koreıa Respýblıkasynyń dıplomatııalyq ókildikteriniń ǵımarattaryn salý úshin Astana qalasynda jer ýchaskelerin berý týraly kelisimdi ratıfıkatsııalaý jónindegi, «Valıýtalyq saıasattyń kelisilgen qaǵıdattary týraly kelisimdi ratıfıkatsııalaý týraly» jáne Qazaqstan men Japonııa úkimetteri arasyndaǵy OAÓEY (Jambyl oblysy) kólik dálizin qaıta jańartý jobasyn júzege asyrý úshin qaryz tartý týraly notalar almasý nysanyndaǵy kelisimdi ratıfıkatsııalaý týraly, sondaı-aq «Japonııa halyqaralyq yntymaqtastyq agenttigi men Qazaqstan Respýblıkasynyń Úkimeti arasyndaǵy OAÓEY (Jambyl oblysy) Kólik dálizin qaıta jańartý jobasy boıynsha Qaryz týraly kelisimdi ratıfıkatsııalaý týraly», Qazaqstan men AQSh úkimetteri arasyndaǵy Aýǵanstan Islam Respýblıkasynyń qaýipsizdigin, turaqtylyǵyn jáne ony qaıta qalpyna keltirýdi qamtamasyz etý jónindegi is-qımylǵa Amerıka Qurama Shtattarynyń qatysýyna baılanysty Qazaqstan Respýblıkasynyń aýmaǵy arqyly ótetin júk pen personaldyń áýe tranzıti týraly kelisimdi ratıfıkatsııalaý týraly zań jobalary Parlament Májilisiniń jalpy otyrysynyń kún tártibine engiziletin boldy.