Májilistiń birinshi Bıýro otyrysynda Elbasy belgilegen basymdyqtar talqylandy
ASTANA. QazAqparat - Búgin Májilis spıkeri Nurlan Nyǵmatýlınniń tóraǵalyǵymen Bıýro otyrysynyń úshinshi parlamenttik sessııasynyń birinshi otyrysy ótti. Sessııanyń ashylýynda Elbasy belgilegen zańnamalyq basymdyqtar basshylyqqa alynyp, birqatar máseleler talqylandy, dep habarlaıdy QazAqparat palatanyń baspasóz qyzmetine silteme jasap.
Palatanyń aldaǵy ýaqytta ótetin otyrysynda Májiliske kelip túsken jańa zań jobalarynyń qorytyndylaryn daıyndaý merzimin anyqtaý usynyldy.
Bular - «2018-2020 jyldarǵa arnalǵan respýblıkalyq bıýdjet týraly» jáne «Qazaqstan Respýblıkasynyń Ulttyq qorynan 2018-2020 jyldarǵa arnalǵan kepildendirilgen transfert týraly» qarjylyq zańdar jobasy. Sondaı-aq «Qazaqstan Respýblıkasyndaǵy kedendik retteý týraly» Kodeksiniń jobasy jáne ilespe túzetýler bar.
Májiliske turǵyn úı qatynastary máseleleri boıynsha jańa zań jobasy, ákimshilik quqyqbuzýshylyq, esirtki, psıhotroptyq zattar, sol tektester men prekýrsorlar aınalymyn baqylaý týraly túzetýler jáne ákimshilik quqyq buzýshylyq týraly Kodeksine túzetýler kelip túsken.
Qujattardyń ishinde ratıfıkatsııalanatyn aktiler de bar. Olar -Eýrazııalyq ekonomıkalyq odaqtyń Keden kodeksi týraly Sharty men 1996 jylǵy 9 jeltoqsandaǵy Nıý-Delıde jasalǵan Qosarlanǵan salyq salýdy boldyrmaý týraly Konventsııa men Hattama.
Májiliske túsken ratıfıkatsııalanatyn paketter men túzetýge engiziletin 2006 jylǵy 20 naýryzdaǵy Qazaqstan men Ózbekstan arasyndaǵy Halyqaralyq avtomobıl qatynasy týraly Kelisim men osy syndy Qazaqstan men Norvegııa arasyndaǵy Halyqaralyq avtomobıl tasymaldary týraly kelisimdi atap kórsetýge bolady.
Jańa zań jobalarynyń qatarynda «Ustap berý týraly konventsııany ratıfıkatsııalaý týraly» Qazaqstan Respýblıkasy zańynyń jobasy, sondaı-aq Qazaqstan men Saýd Arabııasy arasyndaǵy ustap berý, sottalǵan adamdardy berý týraly Kelisimdi ratıfıkatsııalaý týraly aktiler kún tártibiniń jobasyna engizilgen.
Sondaı-aq, palata depýtattarynyń plenarlyq otyrysynda ratıfıkatsııalyq qujattardy, atap aıtsaq, Qazaqstannyń Serbııamen sottalǵan adamdardy berý týraly shartty ratıfıkatsııalaý týraly kelisimsharty qaraý usynyldy.
Búgin Bıýro otyrysynda «Memlekettik tildiń latyn grafıkasyndaǵy álipbıiniń biryńǵaı standartyn engizý máseleleri týraly» parlamenttik tyńdaý ótkizý týraly sheshim qabyldandy.
