Májilistiń bir top depýtaty Qyzylaǵash aýylynyń turǵyndaryna árqaısysy 100 myń teńgeden qarajat aýdardy

dep habarlaıdy QazAqparat.

Májilis depýtattary óz áriptesterine jáne Senat depýtattaryna, respýblıkalyq deńgeıdegi barlyq memlekettik organdar men vedomstvolardyń qyzmetkerlerine Úndeý joldap, bir kúndik eńbekaqylaryn apat zardaptaryn joıýǵa arnalǵan qorǵa aýdarýǵa shaqyrdy.

«Kóp tilegi - kól» degen. Osy Úndeýge alǵashqy bolyp qol qoıǵan depýtattar Dınar Nóketaeva, Gúljan Qaraǵusova, Aıtkúl Samaqova, Zaǵıpa Balıeva, Lıýdmıla Hochıeva, Gúlmıra Isimbaeva, Sát Toqpaqbaev, Úsengeldi Medeýov, Kerimjan Bıjanov, Ermuhanbet Omarov, Turarbek Asanov, Ramazan Sárpekov, Nurtaı Sabılıanov jáne Ýálıhan Qalıjan árqaısysy 100 myń teńgeden ashylǵan arnaýly esepshotqa aqsha aýdardy.

Aıta ketý kerek, Qyzylaǵashtaǵy sý qoımasynyń apatyna baılanysty Elbasy keńes ótkizip, Úkimet aldyna naqty tapsyrmalar berdi. Zardap shegýshilerge qarjylaı, materıaldyq, medıtsınalyq kómek berý, barlyq sý qoımalarynyń jaǵdaıyn tekserip, shuǵyl sharalar qabyldaýdy mindettedi.

Qyzylaǵash aýylyndaǵy 465 úıdiń 146-syn sý shaıyp, 251 úı turýǵa kelmeıtin jaǵdaıda. Al 42 úı kúrdeli jóndeýdi qajet etedi.

Áriptesteriniń tilegin jetkizgen Májilis depýtaty Ýálıhan Qalıjan qıyndyqqa dýshar bolǵan baýyrlarǵa kómek qolyn sozýǵa shaqyrdy.

(Bank esepshoty - Qazaqstannyń Halyq banki AQ Taldyqorǵan aımaqtyq fılıaly:

IIK: 002700125 kzt

BIK banka: 194101601

RNN: 530200007643

Kbe: 18)