Májilistiń aldaǵy jalpy otyrysynyń kún tártibi belgilendi
ASTANA. 24 mamyr. QazAqparat - Búgin Májiliste Palata spıkeri Nýrlan Nyǵmatýlınniń tóraǵalyǵymen ótken Bıýro otyrysynda alda bolatyn jalpy otyrystyń kún tártibiniń jobasy belgilendi.
Depýtattardyń qaraýyna ratıfıkatsııalanatyn bir top qujat usynylady. Máselen, Qazaqstan men Chehııa arasyndaǵy ınvestıtsııalardy kótermeleý jáne ózara qorǵaý; 2007 jylǵy 18 tamyzdaǵy Qazaqstan men Qytaı arasyndaǵy gaz qubyryn salý men paıdalanýdaǵy yntymaqtastyq; 1992 jylǵy 25 mamyrdaǵy Qazaqstan men Reseı arasyndaǵy dostyq, yntymaqtastyq jáne ózara kómek týraly Sharttarǵa túzetýler engizý máseleleri qaralatyn bolady.
Palata ekinshi oqylymda keıbir zańnamalyq aktilerge: memlekettiń kepildik berilgen zań kómegin usynýy júıesin jetildirý; Memlekettik josparlaý júıesi; jańartylatyn energııa kózderin paıdalanýdy qoldaý máseleleri boıynsha túzetýler engizýdi de qaraıtyny kútilýde.
Aldaǵy jalpy otyrystyń kún tártibine Qazaqstan men Lıýksembýrg arasyndaǵy tabys pen kapıtalǵa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly 2008 jylǵy 26 maýsymda Astanada qol qoıylǵan konventsııany jáne osy konventsııaǵa túzetýlerdi ratıfıkatsııalaý týraly zań jobasyna salalyq komıtetke qorytyndy ázirleý mezgilin naqtylaý da usynylatyn bolady.
Depýtattar osy otyrysta keıbir zańnamalyq aktilerge ıývenaldyq ádiletti jetildirý máseleleri boıynsha túzetýlermen jumysty odan ári jalǵastyrýdy da anyqtaıtyn bolady.
