Májilistegi «Nur Otan» partııasynyń fraktsııasy ózin-ózi retteıtin uıymdar týraly zań jobasyn Úkimetke jibermek
ASTANA. QazAqparat - Májilistegi «Nur Otan» partııasynyń fraktsııasy ózin-ózi retteıtin uıymdar týraly zań jobasyn Úkimetke jiberetin boldy.
Mundaı sheshim búgin Májilis vıtse-spıkeri Darıǵa Nazarbaevanyń tóraǵalyǵymen ótken fraktsııanyń keńeıtilgen otyrysynda qabyldandy.
«Búgin qarastyrylyp otyrǵan «Ózin-ózi retteıtin uıymdar týraly» zań jobasyna bizdiń fraktsııa janyndaǵy Ekonomıkalyq saıasat jónindegi keńes bastamashy bolǵan edi. Ol múddeli memlekettik organdar ókilderiniń qatysýymen keńes alańynda birneshe márte tyńǵylyqty qaraldy. Buǵan qosa, zań jobasy fraktsııa men Ulttyq palatanyń birlesken jumys josparyna sáıkes ázirlendi»,- dedi otyrysty ashqan D.Nazarbaeva.
Zań jobasy ózin-ózi retteıtin uıymdardyń mazmunyn, qaǵıdattaryn, quqyqtyq mártebesin aıqyndaıdy jáne kásipkerlik qyzmet sýbektileriniń múddelerin qorǵaý, olardyń shyǵarylǵan taýarlardy tutynýshylar aldyndaǵy jaýapkershiligin kúsheıtý jáne ózin-ózi retteıtin uıymdarǵa qatysýshylardyń qyzmetin memlekettik retteýge jáne baqylaýǵa baılanysty bıýdjet shyǵyndaryn azaıtý jónindegi birtutas memlekettik ekonomıalyq saıasatty iske asyrýǵa baǵyttalǵan.
Sonymen qatar zań joabsyn qabyldaý ózin-ózi retteıtin uıymdardyń damýy úshin qolaıly jaǵdaı jasaýǵa múmkindik berip, bıznes ortaǵa memleket túsiretin ákimshilik júktemeni azaıtady.
