Májilistegi Áleýmettik keńeste oralmandar máselesi talqylandy
TANA. 11 qazan. QazAqparat /Qanat Mámetqazyuly/ - Búgin QR Parlamenti Májilisinde «Nur Otan» HDP Fraktsııasy janyndaǵy Áleýmettik keńestiń kezekti otyrysy bolyp ótti.
Parlamentarızm ınstıtýymen jáne BUU Qazaqstandaǵy ókildigimen birlese ótkizilgen jıyn barysynda «Memlekettiń oralmandarǵa qyzmet túrlerine qol jetkizýdi qamtamasyz etý salasyndaǵy áleýmettik saıasaty» atty taqyryp talqylandy.
«Memleket basshysy óziniń oralmandarmen kezdesýi barysynda qandastarymyzdyń tarıhı otanyna qaraı qadam jasaǵan uly kóshine bıyl 20 jyl tolyp otyrǵanyn atap ótken edi. Rasynda osy jyldar ishinde Qazaqstanǵa 300 myńnan astam otbasy kóship kelip, el halqynyń sany 1 mln. shamasyna artty. Osy jyldar ishinde etnıkalyq qazaqtardyń tarıhı otanyna kóship kelýine, olardyń Qazaqstan jaǵdaıyna beıimdelýine aıryqsha nazar aýdarylyp keledi. Bul rette Prezıdent jarlyǵymen 2007-2015 jyldarǵa arnalǵan Kóshi-qon saıasatynyń tujyrymdamasy qabyldandy. Zańnamalyq bazalar da birshama jetildi. Alaıda osy baǵyttaǵy jumystardy áli de jalǵastyra berýimiz qajet», - dedi jıyndy ashyp sóz sóılegen Áleýmettik keńes tóraıymy Aıtkúl Samaqova. Sonymen qatar, oralmandardyń ómir sapasyn jaqsartý maqsatynda 2009-2011 jyldarǵa arnalǵan «Nurly kósh» baǵdarlamasy qabyldanǵanyn aıtqan A. Samaqova, qazirgi tańda atalmysh baǵdarlamanyń ekinshi kezeńin ázirleý de josparlanyp otyrǵanyn jetkizdi.
Jıyn barysynda oralmandardy jańa jaǵdaıǵa beıimdeý úderisterindegi problemalar talqylandy. Atap aıtqanda, oralmandardyń memlektettik jáne orys tilderin úırenýi áli de jetkiliksiz deńgeıde júrgizilip jatqandyǵy, turǵyn úı qurylysy men sharýashylyq qyzmet maqsatyndaǵy jer ýchaskelerin bólýdegi problemalar jaıynda sóz boldy. Eńbekke qabiletti oralmandardyń jumysqa ornalasýyndaǵy problemalar kóterilip, ıpotekalyq nesıe alýdaǵy kedergiler áńgimege arqaý boldy.
Keńes otyrysynda QR Іshki ister mınıstrliginiń Kóshi-qon komıtetiniń tóraǵasy Patrıs Nokın, Eńbek jáne halyqty áleýmettik qorǵaý vıtse-mınıstri Serik Ahmetov baıandama jasady. Jıyn qorytyndysyna sáıkes, qatysýshylar memlekettik organdarǵa baǵyttalǵan birqatar usynymdar ázirlep, qabyldady.
