Májiliste jumyspen qamtý máselelerin retteıtin qujat tanystyryldy
ASTANA. QazAqparat - QR Parlamenti Májilisinde «Qazaqstan Respýblıkasynyń keıbir zańnamalyq aktilerine halyqtyń jumyspen qamtylýyn formalızatsııalaý máseleleri boıynsha ózgerister men tolyqtyrýlar engizý týraly» zań jobasy tanystyryldy, dep habarlaıdy QazAqparat.
QR Eńbek jáne halyqty áleýmettik qorǵaý vıtse-mınıstri Svetlana Jaqypovanyń sózine qaraǵanda, ózgerister men tolyqtyrýlar 3 kodekske, ıaǵnı Salyq, Kásipkerlik, Bıýdjet kodeksterine, sondaı-aq 6 zańǵa engiziledi.
Osy maqsattarǵa qol jektizý úshin zań jobasynyń aıasynda birqatar qadamdar usynylady. Birinshiden, biryńǵaı jıyntyq tólemdi engizý arqyly beıresmı jumyspen qamtylǵandardyń qyzmetin zańdastyrý boıynsha júıeli sharalar eskerilgen. Ekinshiden, «jumyspen qamtylǵan adam» jáne «táýelsiz jumysker» sózderiniń, sondaı-aq jumyspen qamtylǵan halyqqa jatatyn sanattardyń biryńǵaı anyqtamasy qarastyrylady. Úshinshiden, áleýmettik saqtandyrý, mindetti áleýmettik medıtsınalyq saqtandyrý jáne zeınetaqymen qamsyzdandyrý týraly zańdarda tóleýshiler sanattaryn birdeı qoldaný usynylady.
Mınısterliktiń málimetine súıensek, 2018 jylǵy ekinshi toqsandaǵy qorytyndy boıynsha jumyspen qamtylǵan halyqtyń sany 8,6 mln adamdy qurady, onyń ishinde 6,5 mln jaldamaly jumysker jáne 2 063 ózin-ózi jumyspen qamtyǵan adam bar. Respýblıka ekonomıkasynda jalpy jumyspen qamtylǵandardyń 16 paıyzy beıresmı jumyspen qamtylǵandar, onyń ishinde 800 myńǵa jýyq jaldamaly jumysker eńbek shartynsyz jumys isteıdi, sondaı-aq 588 myń adam ózin-ózi jumyspen qamtyǵandar.
«Beıresmı jumyspen qamtylǵandardyń qyzmetin zańdastyrý úshin salyq organdarynda tirkelýdiń jeńil túrin kózdeıtin Biryńǵaı jıyntyq tólemdi engizý josparlanyp otyr. Biryńǵaı jıyntyq tólemdi engizý beıresmı jumyspen qamtylǵandardyń qyzmetin tirkeýmen qatar, mindetti medıtsınalyq jáne áleýmettik saqtandyrý, zeınetaqymen qamsyzdandyrý júıelerine qatysýǵa múmkindik beredi. Bul rette, Biryńǵaı jıyntyq tólemniń mólsheri bekitiledi, ıaǵnı ártúrli áleýmettik qorlarǵa jarnalardy óz betinshe esepteý qajet bolmaıdy», - dedi vıtse-mınıstr.
