Májiliste jumys istegim kelmeıdi - Olga Rypakova
ASTANA. QazAqparat - Sport.inform.kz ınternet-portalyna suhbat bergen úsh qarǵyp sekirýden Olımpıada chempıony Olga Rypakova memlekettik basqarý júıesinde jumys istegisi kelmeıtindigin aıtty.
Sońǵy úsh Olımpıadada júldeger atanǵan Rypakova eldegi jeńil atletıkanyń qazirgi ahýalymen, sondaı-aq alǵa qoıǵan maqsattarymen bólisti.
- Olga, elimizde jeńil atletıkaǵa degen qyzyǵýshylyq tıisti deńgeıde emes. Buǵan ne deısiz?
- Qazirgi tańda halyqtyń kózqarasy ózgerdi. Aqyryndap jeńil atletıka da tanymal sport túrleriniń qataryna qosylyp keledi. Aldaǵy ýaqytta joǵary nátıje kórsetý arqyly jeńil atletıkanyń Qazaqstandaǵy bedelin odan ary arttyramyn dep senemin.
- Tokıodaǵy Olımpıada oıyndarynan otandastaryńyz ózińiz aıtqan joǵary nátıjeni kútedi. Daıyndyq qalaı bolyp jatyr?
- Kún-tún demeı jattyǵyp jatyrmyn. Daıyndyq jumystary jaman emes.
- Olımpıadadan keıin, mansabyńyzdy aıaqtaǵannan keıin nemen aınalysý oıda bar?
- Ázirge ol týraly oılamappyn. Barlyǵyn ýaqyttyń enshisine qaldyrdym.
- Sápıev sekildi Parlament Májilisiniń depýtaty bolǵyńyz kelmeı me?
- Shynymdy aıtsam, Májiliste jumys istegim kelmeıdi. Ózimdi bılik júıesinen kórmeımin.
Avtory Muhtar Jámishjanov
