Májiliste «Jol júrisi týraly» jańa zań jobasy tanystyryldy
ASTANA. 12 aqpan. QazAqparat - Búgin Parlament Májilisinde «Jol júrisi týraly» jáne «QR keıbir zańnamalyq aktilerine jol júrisi máseleleri boıynsha ózgerister men tolyqtyrýlar engizý týraly» zań jobasynyń tanystyrylymy bolyp ótti.
Atalǵan zań jobalarynyń maqsaty jol júrisi jáne onyń qaýipsizdigin qamtamasyz etý salasynda memlekettik jáne jergilikti atqarýshy organdardyń qyzmetin úılestirýdi kúsheıtý bolyp tabylady. Budan bólek, zań jobasymen jol júrisine qatysýshylardyń quqyqtary men mindetteri zańnamalyq deńgeıde retteledi.
«Jalpy «Jol júrisi týraly» qoldanystaǵy zańnyń qabyldanǵanyna 16 jyl toldy. Bul ýaqytta jol qaýipsizdiginiń jaǵdaıyna áser etetin, biraq jol júrisi qaýipsizdigin qamtamasyz etý boıynsha biryńǵaı tujyrymdamalyq kózqarasty jáne qajetti tıimdi sheshimderdi qamtamasyz etpeıtin birqatar zańdar men zańǵa táýeldi aktiler qabyldandy. Budan bólek, qoldanystaǵy zańnamada azamattardyń konstıtýtsııalyq quqyqtaryn qorǵaý máseleleri qalys qalǵan», - dep atap ótti zań jobasy týraly baıandaǵan Іshki ister mınıstriniń orynbasary Erlik Kenenbaev.
Zań jobasynda sondaı-aq, ulttyq zańnamany halyqaralyq sharttarǵa sáıkes keltirý máseleleri de qarastyrylǵan. Bul rette zań jobasymen respýblıka aýmaǵynda aıyrý belgisiniń jáne Qazaqstan Respýblıkasy týynyń sýreti bar jańa memlekettik tirkeý nómirlik belgilerin engizý jáne jańa úlgidegi júrgizýshi kýálikterin engizý kózdelgen.
«Halyqaralyq standarttarǵa sáıkes kólik quraldary men olardyń qosalqy bólshekterine qoıylatyn biryńǵaı qaýipsizdik talaptary belgilenedi», - dedi E. Kenenbaev.
