Májiliste Jezqazǵan óńiriniń ekologııalyq máseleleri kóterildi
«Kóptegen jyldar boıy Úkimet pen Parlamenttiń atyna Jezqazǵan-Ulytaý óńiriniń turǵyndarynan óńirdiń ekologııalyq lastanýyn joıý jáne jergilikti halyqqa qoldaý kórsetý boıynsha sharalar qabyldaý týraly ótinishter kelip túsýde. Bul - Baıqońyr ǵarysh aılaǵynyń qorshaǵan ortaǵa áserimen jurtshylyq baılanystyryp otyrǵan óńirdegi onkologııalyq aýrýlardyń joǵary deńgeıi, aýyz sýdyń sapasy, medıtsınalyq qyzmetterdiń tómen deńgeıi jáne búkil óńirdi ekologııalyq daǵdarys jaǵdaıy aımaǵy dep taný týraly máseleler. Osy máselelerdi obektıvti qaraý qajettigi týraly biz, Qazaqstan Respýblıkasynyń Parlamenti Májilisiniń depýtattary da óz depýtattyq saýaldarymyzda jazdyq. Alaıda, ýákiletti memlekettik organdar atalǵan problemany sheshýden bas tartyp, óńirdiń kópjyldyq qordalanǵan máselelerine den qoımaıdy», - dedi A. Qojahmetov Úkimet basshysy Álıhan Smaıylovtyń atyna joldaǵan saýalynda.
Jezqazǵan-Ulytaý óńirindegi jaǵdaıdyń obektıvti kórinisin anyqtaý jáne tıimdi sheshimder qabyldaý maqsatynda tıisti usynystar jarııalandy
1. Qaraǵandy oblysynyń Jezqazǵan-Ulytaý óńirinde onkologııalyq aýrýlardyń ósý sebepterin zertteý jónindegi vedomstvoaralyq komıssııa qurý suraldy. Komıssııaǵa Baıqońyr ǵarysh aılaǵy qyzmetiniń áseri turǵysynan qorshaǵan ortanyń lastanýyna baǵalaý júrgizý, Komıssııa quramyna densaýlyq saqtaý, ekologııa, tsıfrlyq damý, ınnovatsııalar jáne aeroǵarysh ónerkásibi mınıstrlikteriniń ókilderi, sondaı-aq óńirdiń jurtshylyq ókilderin engizý usynyldy.
2. Jezqazǵan-Ulytaý óńiriniń eldi mekenderi turǵyndarynyń densaýlyq jaǵdaıy skrınınginiń jáne medıtsınalyq tekserýlerdiń 2020-2021 jyldardaǵy nátıjelerin usyný suraldy.
3. Qazaqstannyń ekologııalyq uıymdary qaýymdastyǵynyń 2021 jylǵy 28 maýsymdaǵy «Baıqońyr ǵarysh aılaǵy qyzmetiniń qorshaǵan ortaǵa jáne azamattardyń densaýlyǵyna teris áserin azaıtý» taqyrybyndaǵy dóńgelek ústeldiń usynymdaryn oryndaý talap etildi.
«Qazaqstan Respýblıkasy Prezıdentiniń Úıtas-Aıdos jáne Qojamseıit sýaǵaryn qaıta jańartý jónindegi tapsyrmasynyń oryndalý barysy týraly habarlaýdy suraımyz», -dedi depýtat.
