Májiliste jer qoınaýyn paıdalaný jónindegi zań jobasy talqylandy
A. Qańtardyń 26-sy. QazAqparat /Qanat Mámetqazyuly/ - Búgin QR Parlamenti Májilisi Ekologııa máseleleri jáne tabıǵat paıdalaný komıtetiniń keńeıtilgen otyrysy bolyp ótti.
Jıyn barysynda «Jer qoınaýy men jer qoınaýyn paıdalaný týraly» zań jobasy talqylandy, dep habarlaıdy QazAqparat.
«Atalǵan zań jobasynyń el ekonomıkasy úshin mańyzy zor. Óıtkeni, zańda qamtylatyn óndirýshi sala qyzmeti Qazaqstan ekonomıkasynyń lokomotıvi bolyp tabylady. Jer qoınaýyn jáne ondaǵy resýrstardy tıimdi paıdalaný halyqtyń turmysynyń jaqsarýyna da septigin tıgizedi. Sondyqtan da, bul saladaǵy qoǵamdyq qatynastardy zań turǵysynan retteýdiń mańyzy zor. Osy arqyly resýrstardy ıgerý, paıdalaný jáne óndiriste qoldaný úderisin elimizge ońtaıly jaǵdaıdy ornyqtyrý, sheteldik ınvestorlar úshin qolaıly klımatty qalyptastyrý máselesiniń sheshimi tabylady», dedi jıynǵa jetekshilik etken Komıtet tóraǵasy Erlan Nyǵmatýlın.
Zań jobasy kúshine ense, bul qoldanystaǵy osyndaı zań men «Munaı týraly» zańdardy almastyratyn bolady. Sonymen birge qujat jer qoınaýyn paıdalanýǵa baılanysty zańdy jetildirip, ondaǵy olqylyqtardy joıyp, zańnyń jer qoınaýyn paıdalaný salasyndaǵy jumystaryna tikeleı yqpalyn arttyrýǵa baǵyttalǵan. Budan basqa, qujat memlekettiń, ıaǵnı jer qoınaýy baılyqtary ıesiniń múddesin qorǵaýdy kózdeıdi. Bul shara jer qoınaýyn paıdalanýshylardyń qyzmetine jedel ári barynsha ashyq baqylaý júrgizý arqyly júzege asady. Sonymen qatar qujat jer qoınaýyn paıdalaný quqyǵyn berý sharalaryn ońtaılandyryp, oǵan qajetti ruqsat qaǵazdarynyń sanyn qysqartady.
