Májiliste jedel járdem qyzmetine qatysty el turǵyndarynyń usynysy aıtyldy
NUR-SULTAN. QazAqparat – QR Parlamenti Májilisiniń depýtaty Saýytbek Abdrahmanov jedel járdem qyzmetine qatysty el turǵyndarynyń usynysyn jarııalady, dep habarlaıdy QazAqparat.
Atalǵan máselege baılanysty QR Premer-Mınıstriniń orynbasary Berdibek Saparbaevtyń atyna depýtattyq saýal joldandy.
«Biraz ýaqyttan beri «jedel járdem» qyzmeti ortalyqtandyryldy. Búginde kez kelgen ótinim aldymen oblys ortalyǵyna jetkiziledi, sonda qabyldanyp, tirkelgennen keıin ǵana aýdandaǵy «jedel járdem» qyzmetine oblystan tapsyrma beriledi. Sondaı tapsyrma alynbaıynsha «jedel járdem» aýyr naýqasqa attana almaıdy. Munyń búkil oblystaǵy jaǵdaıdy bir ýysta ustap otyrýǵa múmkindik beretinine, tapsyrysty úılestirýde ózindik artyqshylyǵy barlyǵyna daý aıta almaspyz, biraq ýaqyttan utyldyratynyna, al baılanys bolmaı nemese ótinim alýǵa tıisti adam ornynan tabylmaı qalǵan jaǵdaıda qaterli ekendigine kúmán joq», - dep toqtaldy S. Abdrahmanov QR Parlamenti Májilisine Qazaqstan halqy Assambleıasynan saılanǵan depýtattar saýalyn jarııalaý barysynda.
Onyń aıtýynsha, saılaýshylar «jedel járdem» qyzmetin úılestirýdi burynǵydaı aýdandyq densaýlyq saqtaý bólimderiniń qaramaǵynda qaldyrýdy usynady.
