Májiliste jastar máselesine arnalǵan zań jobasy tanystyryldy
ASTANA. 12 naýryz. QazAqparat - Búgin QR Parlamenti Májilisinde «Qazaqstan Respýblıkasynyń keıbir zańnamalyq aktilerine memlekettik jastar saıasaty máseleleri boıynsha ózgerister men tolyqtyrýlar engizý týraly» zań jobasynyń tanystyrylymy bolyp ótti.
«Jastar saıasaty memleket damýyndaǵy mańyzy zor baǵyttyń biri. Qoǵam men memlekettiń aldynda jastar qýatyn paıdalaný úshin jaǵymdy alǵyshart jasaý, jastardyń áleýmettik yntalaryn qoldaý tetikterin engizý, olardyń áleýmettik múddelerin aıqyndap, olardy iske asyrý maqsattary qoıylǵan. Búgingi kúni elimizdegi ólshem boıynsha jastar qataryna jasy 14 pen 29 arasyndaǵy azamattar kiredi. Bul top jalpy halyqtyń 30 paıyzyn quraıdy. Sondyqtan da, bizdiń oıymyzsha, patrıottyq sana-sezimdi, azamattyq ustanymdy arttyrýǵa, belsendi qoǵamdyq ustanym men salaýatty ómir saltyn qalyptastyrýǵa, kásipkerlik jáne ınnovatsııalyq áleýetti damytýǵa baǵyttalǵan jas urpaqpen ózara is-qımyldyń tıimdi úlgisin ázirleý qajet», dedi zań jobasy boıynsha qurylǵan jumys tobynyń jetekshisi depýtat Meıram Begentaev.
Jalpy alǵanda zań jobasy elimizdegi jas azamattardyń memlekettik jáne qoǵamdyq ómirge belsene qatysýyn qamtamasyz etý jónindegi sharalardy jetildirý, áleýmettik problemalardy sheshýge kómekter kórsetý, jastardyń básekelestik basymdyqtaryn arttyrý úshin jaǵdaılar jasaý, memlekettik jastar saıasatyn iske asyrýda memlekettik organdardyń jaýapkershiligin kúsheıtý jáne jastar saıasaty salasyndaǵy normatıvtik-quqyqtyq bazany jetildirý maqsatynda ázirlengen.
«Zań jobasy Elbasynyń «Jas Otan» jastar qanatynyń 1-sezinde memlekettik jastar saıasatyn jetildirý týraly júktegen tapsyrmasyn oryndaý maqsatynda ázirlendi. Qujattyń negizgi strategııalyq maqsaty - jastardyń áleýmettik-ekonomıkalyq damýyna yqpal etý, olardyń memlekettik jastar saıasatyna qatysýyna jaǵdaı jasaý, osy saıasatty iske asyrý boıynsha memlekettik organdardyń quzyretin aıqyndaý», - deıdi zań jobasy boıynsha baıandaǵan Bilim jáne ǵylym mınıstriniń orynbasary Mahmetǵalı Sarybekov.
