Májiliste jańa redaktsııadaǵy Qylmystyq kodeks jobasynyń tanystyrylymy ótýde
ASTANA. 24 qazan. QazAqparat - Búgin Májiliste jańa redaktsııadaǵy QR Qylmystyq Kodeksiniń jáne «QR keıbir zańnamalyq aktilerine qylmystyq zańnamalardy jetildirý máseleleri boıynsha ózgerister men tolyqtyrýlar engizý týraly» zań jobasynyń tusaý keseri ótýde. Sharaǵa Parlament depýtattary, múddeli memlekettik organ ókilderi, úkimettik emes uıymdar músheleri qatysýda.
Toqtala ketetin jaıt, Táýelsiz Qazaqstannyń qoldanystaǵy Qylmystyq kodeksi el Konstıtýtsııasymen tanylǵan joǵary qundylyqtar - adam, onyń ómiri, quqyqtary men bostandyqtaryn senimdi túrde qorǵaýǵa umtylysyn kórsetedi. Alaıda, qoldanystaǵy Qylmystyq kodeks osy ýaqytqa deıin birneshe márte ózgeristerge ushyraǵan bolatyn. Onyń úsh júzge jýyq babyna ózgerister engizgen alpystan astam zańdar qabyldanǵan bolatyn. Al engizilgen ózgerister Kodeksti tájirıbede qoldanǵan kezde paıda bolǵan máselelerdi sheshýge baǵyttalǵan. Degenmen, mamandardyń aıtýynsha, qylmystyq zańnamadaǵy kezdesetin máselelerdi tek ózgerister engizip qana sheshý birqatar qıyndyqtar týdyrǵan. Sondyqtan da ýaqyt pen tájirıbe arqyly tekserilgen qylmystyq-quqyqtyq ınstıtýttardy saqtaı otyryp, Qylmystyq kodekstiń jańa redaktsııasyn daıyndaýdyń ózektiligi týyndaǵan. Osyǵan oraı, kodeks jobasy QR Prezıdentiniń Joldaýynda júktelgen tapsyrmasyn, sonymen qatar elimizdiń quqyqtyq saıasat tujyrymdamasynyń erejelerin iske asyrýǵa baǵyttalady.
Kodeks jobasynda qylmystyq quqyq buzýshylyqty birinshi ret jasaǵan kámeletke tolmaǵandarǵa, áleýmettik turǵydan osal toptardyń basqa da sanattaryna qylmystyq yryqtandyrýmen jáne izgilendirýmen qatar, qylmystyń barlyq jańa túrlerine qarsy kúrestiń negizderi qalanǵan. Sonymen birge, krımınaldyq qyzmettiń belsendiligi baıqalatyn salalarda jaza qatańdatylyp, ulttyq kelisim tuǵyryna nuqsan keltirýdiń jáne áleýmettik janjaldardy arandatýdyń kez kelgen áreketi úshin qatań jazalaý kózdeledi.
