Májiliste jańa redaktsııadaǵy Azamattyq is-júrgizý kodeksiniń jobasy tanystyryldy

Májilistiń Zańnama jáne sot-quqyqtyq reforma komıtetiniń tóraǵasy Rahmet Muqashevtyń aıtýynsha, jańa kodeks ázirleý negizinen búgingi kún talabynan týyndap otyr. «Qoldanystaǵy kodeks naryqtyq qatynastar jańa qalyptasa bastaǵan 1999 jyly qabyldanǵan bolatyn. Sol tusta Azamattyq is-júrgizý kodeksiniń maqsaty naryqtyq qatynastar qalyptastyrýǵa, sheteldik ınvestorlar tartýǵa jaǵdaılardy ońtaılandyrý edi. Bul mindet tolyǵymen oryndaldy dep aıtýǵa bolady. Onyń ústine ekonomıkalyq qatynastardy odan ári damytý, sondaı-aq sheteldik ınvestıtsııalar aǵyny men aqparattyq tehnologııalardyń damýy qoldanystaǵy zańnamaǵa birqatar ózgeristerdi talap etedi», - dedi Rahmet Muqashev.

Toqtala ketetin jaıt, Memleket basshysy Qazaqstan sýdıalarynyń sezinde sot júıesin damytýdyń basym baǵyttaryn aıqyndaǵan bolatyn. Soǵan baılanysty azamattyq is-júrgizý zańnamasyna azamattyq isterdi qaraýǵa yńǵaıly ári jedel qaraý tártipteri engizilýi tıis. Bul rette isterdi qaraýdaǵy taraptardyń bitimgerligine, zamanaýı tehnologııalardy keńinen qoldanýǵa basymdyqtar berilýi shart. Rahmet Muqashevtyń aıtýynsha, Azamattyq is-júrgizý kodeksi alǵa qoıylǵan osyndaı maqsattarǵa jaýap bere alady.