Májiliste zańsyz jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy zań jobasy tanystyryldy
ASTANA. Naýryzdyń 4-i. QazAqparat /Qanat Mámetqazyuly/ - Búgin QR Parlamenti Májilisiniń Qarjy jáne bıýdjet komıtetiniń otyrysynda «Qazaqstan Respýblıkasynyń keıbir zańnamalyq aktilerine zańsyz jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» zań jobasynyń tanystyrylymy bolyp ótti,
dep habarlaıdy QazAqparat.
Zań jobasy elimizdiń ulttyq zańnamasyn QR Konstıtýtsııalyq keńesiniń 2009 jylǵy tamyzdyń 20-syndaǵy sheshimine sáıkes keltirý maqsatynda ázirlengen bolatyn. Esterińizge sala keteıik, Parlament palatalarynyń tóraǵalary QR Konstıtýtsııalyq Keńesine «Qazaqstan Respýblıkasynyń keıbir zańnamalyq aktilerine zańsyz jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» zańyna engizilgen ózgeristerdiń Ata zańǵa sáıkestigi jóninde suraý salǵan bolatyn. Bul rette Konstıtýtsııalyq Keńes usynylǵan materıaldar negizinde qujattyń elimizdiń Negizgi zańyna qaıshy kelmeıtinin málimdegen edi. Degenmen, Keńes zańnamanyń jekelegen erejelerinde naqtylaý bolmaǵanyn, al ondaı normany qoldanysqa engizý azamattardyń konstıtýtsııalyq quqyqtarynyń buzylýyna ákep soǵýy múmkindigin eskertken bolatyn.
Jalpy, zań jobasy boıynsha azamattardy jáne kásipkerlerdi quqyq qorǵaý organdary, sheteldik memleketterdiń ýákiletti organdary tarapynan negizsiz qýdalaý faktilerine jol berilmeıdi. Sonymen birge, qujatta «kóleńkeli ekonomıkanyń» keńeıýiniń adyn alý, bıýdjetke salyq túsimderin arttyrý sharalary kózdeledi. Osyǵan oraı, zań jobasymen Azamattyq kodekske, QR Ákimshilik quqyq buzýshylyq kodeksine, «QR Bankteri jáne banktik isteri týraly» «Baǵaly qaǵazdar naryǵy týraly» zańdaryna ózgerister engiziletin bolady.
Zań jobasy jumys tobynda jan-jaqty talqylaýǵa jiberiledi.
