Májiliste zańsyz jolmen alynǵan kiristerdi zańdastyrýǵa qarsy joba tanystyryldy
ASTANA. 14 aqpan. QazAqparat - Búgin QR Parlamenti Májilisiniń Qarjy jáne bıýdjet komıtetiniń uıymdastyrýymen «Qazaqstan Respýblıkasynyń keıbir zańnamalyq aktilerine zańsyz jolmen alynǵan kiristerdi
zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» zań jobasynyń tanystyrylymy bolyp ótti.
Qujatty tanystyrǵan Qarjy vıtse-mınıstri Rýslan Dálenovtyń aıtýynsha, zańsyz jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyl máselelerin qamtıtyn qoldanystaǵy zańnamanyń qyzmetin úsh toptamaǵa bólýge bolady. Olar: qarjylyq monıtorıng sýbektileri; ýákiletti organ - Qarjylyq monıtorıng komıteti; ýákiletti organnyń memlekettik organdarmen jáne qarjylyq barlaýdyń sheteldik bólimshelerimen ózara árekettestigi. «Al jańa zań jobasyn ázirleýge eń birinshiden Konstıtýtsııalyq Keńespen qoldanystaǵy zań normasynyń Konstıtýtsııaǵa sáıkestigine qatysty qarsylyǵy negiz boldy. Bundaı qarsylyqtyń qorytyndysyna oraı, Konstıtýtsııalyq keńestiń 2009 jylǵy 20 tamyzda arnaıy qaýlysy shyǵyp, birqatar usynymdar berilgen bolatyn», - deıdi Qarjy vıtse-mınıstri.
Onyń sózine qaraǵanda, jańa zań jobasy buǵan deıin kórinis tapqan quqyqtyq qaıshylyqtardy eńserýge baǵyttalady. Máselen, buǵan deıin konstıtýtsııalyq mándegi áreketterdi júzege asyrý barysynda ózderiniń klıentterin qorǵaý turǵysynda advokattar arasynda múddelik qaqtyǵystar oryn alǵan. Bundaı jaǵdaıda olar ózderiniń klıentteri týraly Qarjylyq monıtorıng komıtetine habarlaýy tıis bolatyn. Osyǵan oraı, jańa jobada qajetti norma engizilip otyr. Budan bólek, taǵy bir túzetýler boıynsha jeke salymshylardyń quqyqtary qamtamasyz etiletin bolady, sondaı-aq banktik salym berýdiń shegi úshin negizdemeler bekitiledi.
Zań jobasy jumys tobynda odan ári talqylanatyn bolady.
