Májiliste volonterlik qyzmet týraly zań jobasy tanystyryldy
ASTANA. QazAqparat - Búgin Parlament Májilisinde «Volonterlik qyzmet týraly» zań jobasynyń tusaýkeseri ótti. Atalǵan qujat elimizdegi volonterlik qyzmettiń tutas júıesiniń qyzmetine quqyqtyq negiz qalaý, volonterlik qyzmetti júzege asyratyn ınstıtýttar men uıymdardyń qurylymyn, jumys isteý tetikterin qurý maqsatynda ázirlengen.
Sonymen qatar, zań jobasynda volonterlik qyzmettiń maqsattary men mindetterin, túrlerin, volonterlik qyzmetke qatysýshylardyń quqyqtary men mindetterin, osy saladaǵy memlekettik bılik organdary men jergilikti ózin-ózi basqarý organdarynyń ókilettikterin aıqyndaý qarastyrylady.
«Volonterlik qyzmet týraly zańnamanyń ózektiligi bir jaǵynan atalmysh ınstıtýttyń qarqyndy damýymen baılanysty bolsa, ekinshi jaǵynan volonterlik qyzmettiń jetkilikti dárejede normatıvtik quqyqtyq rettelmeýine baılanysty týyndaıdy. Osyǵan oraı, zań jobasynyń retteý nysanasy jumystardy óteýsiz oryndaý, qyzmetter kórsetý nysanynda erikti túrde qoǵamdyq paıdaly qyzmetti júzege asyrýǵa baılanysty týyndaıtyn qoǵamdyq qatynastar bolyp tabylady», - deıdi Májilis depýtaty Meıram Begentaev.
Onyń sózine qaraǵanda, zań jobasynda volonterlerdi tirkeýdiń ońaılatylǵan tártibi, sondaı-aq olardyń jeke basyn jáne mártebesin rastaıtyn derbes qujattar bolyp tabylatyn volonterdiń jeke kitapshasyn ázirleý jáne berý tártibin aıqyndaıdy. Budan bólek, volonterlik qyzmet boıynsha memlekettik saıasatty iske asyratyn, volonterlik bos oryndardyń tizilimin júrgizetin, sonymen qatar halyqaralyq mańyzy bar memlekettik volonterlik baǵdarlamalar týraly aqparatty ornalastyratyn ýákiletti organdy aıqyndaý kózdelgen. Ýákiletti organdy Qazaqstan Respýblıkasynyń Úkimeti aıqyndaıtyn bolady.
«Volonterlik qyzmet jeke tulǵalardyń, zańdy tulǵalardyń múddelerinde erkin tańdaý negizinde jeke jáne óteýsiz negizde júzege asyrylatyn erikti qyzmet (erikti eńbek) retinde aıqyndalady. Volonterlik óz eńbegi úshin belgili bir jaýapkershilik deńgeıimen ushtasady. Memleket áleýmettik problemalardy sheshý jáne neǵurlym ózekti problemalar týraly «keri baılanys» alý úshin, sondaı-aq volonterlik eńbekten ekonomıkalyq tıimdilikti arttyrý úshin volonterlik qyzmetti damytýǵa múddeli», - dedi depýtat M. Begentaev.
Onyń aıtýynsha, qujat volonterlik qyzmet salasynda týyndaıtyn qoǵamdyq qatynastar júıesin aıqyndaýǵa, áleýmettik baǵdarlanǵan kommertsııalyq emes uıymdardyń qyzmetiniń tıimdiligin arttyrýǵa yqpal etedi.
