Májiliste Úkimettiń 2016 jylǵa bıýdjettiń atqarylýy esebi tanystyryldy
«Atqarý qorytyndylary salyq-bıýdjet saıasatynyń ekonomıkalyq jaǵdaıǵa áseriniń oń nátıjesin kórsetedi. Bıýdjettiń negizgi parametrlerine kelsek, túsimder 100,2 paıyzǵa oryndalyp, 7 trln 760 mlrd teńgeni qurady. Shyǵystar 8 trln 501 mlrd teńgege atqarylyp, 98,3 paıyzǵa ıgerildi. Bıýdjet tapshylyǵy 741 mlrd teńgeni qurady. Bul aldyńǵy jospardaǵy kórsetkishten 161,5 mlrd teńgege tómen», - dep toqtaldy QR Qarjy mınıstri Baqyt Sultanov.
Respýblıkalyq bıýdjettiń 2016 jyly atqarylýynyń negizgi sıpattamalaryna toqtalǵan mınıstr, bıýdjettiń atqarylýynyń negizgi jetistikteriniń biri bıýdjet kiristeriniń 2015 jylmen salystyrǵanda 1 078 mlrd teńgege kóp jınalýyna baılanysty ekenin jetkizdi. Sonymen qatar shyǵystar 2015 jylǵa qaraǵanda 18,6 paıyzǵa, ıaǵnı 1 338 mlrd teńgege artyq ıgerildi.
«Bıýdjet tapshylyǵynyń mólsheri bıýdjettiń turaqtylyǵyn sıpattaıdy. Ótken jyly onyń kólemi Jalpy ishki ónimge shaqqanda jospardaǵy 2 paıyzdyń ornyna 1,6 paıyzdy qurady. 2015 jyldyń kórsetkishinen 171 mlrd teńgege azaıdy.
«Kiristerdiń artyǵymen oryndalýy nátıjesinde respýblıkalyq bıýdjette 158,4 mlrd teńge kassalyq qaldyqtar qalyptasty. Bul qarajat bıylǵy aqpan aıynda bıýdjetti naqtylaý úshin negiz boldy. 2016 jyly bıýdjetke 7 662,2 mlrd teńge kiris tústi. Kiristerdiń quramynda salyqtardyń kólemi 2015 jylǵa qaraǵanda 2 paıyzǵa ulǵaıyp, 56 paıyzdy qurady», - dedi Sultanov.
Belgili bolǵandaı, respýblıkalyq bıýdjettiń kiristeri 382 mlrd teńgege asyra oryndaldy. Kepildendirilgen transferttiń kólemi esepti jyly 2 110 mlrd teńgeni qurady, ıaǵnı kiristerdiń 27,5 paıyzy (2015 jyly bul kórsetkish 27,7% quraǵan). Salyqtardyń jospardan artyq túsýi kepildendirilgen transfertti 370 mlrd teńgege saqtap qalýǵa mýmkindik berdi.
«Kiristerdiń bundaı atqarylýynyń negizgi sebebi - ol makroekonomıkalyq kórsetkishterdiń jaqsarýy. Mysaly, jalpy ishki ónimniń ósýi josparlanǵan 0,5 paıyzdyń ornyna 1 paıyzdy qurady. Teńgemen kórsetiletin ımport kólemi josparǵa qaraǵanda 4,3 paıyzǵa jáne metall qunynyń ortasha baǵasy 5,2 paıyzǵa ósti. Budan basqa munaıǵa salynatyn eksporttyq keden bajynyń progressıvtik mólsherlemesin engizý men basqa da faktorlar kiristerdiń asyra oryndalýyn qamtamasyz etti. Salyqtyq ákimshilendirýdiń jaqsarýy esebinen bıýdjetke jospardan tys 46 mlrd teńge tústi», - dedi ol.