Májiliste turmystyq zorlyq-zombylyqqa qarsy is-qımyl týraly jobany talqylaýǵa arnalǵan jıyn ótýde
annyń 27-si. QazAqparat /Qanat Mámetqazyuly/ - Búgin QR Parlamenti Májilisinde «Quqyq buzýshylyqtyń aldyn alý týraly» jáne «Turmystyq zorlyq-zombylyqqa qarsy is-qımyl týraly» zań jobalaryn talqylaýǵa arnalǵan dóńgelek ústel jıyny ótýde.
Atalǵan jıyn Májilistiń josparyna sáıkes EQYU-nyń Astanadaǵy Ortalyǵymen birlesip uıymdastyrylýda, dep habarlaıdy QazAqparat.
Jıynǵa depýtattar, tıisti memlekettik organdar men úkimettik emes uıymdardyń ókilderi, halyqaralyq sarapshylar qatysyp otyr.
«Jalpy osy eki zań jobasy da jekelegen áleýmettik toptar arasyndaǵy, sondaı-aq jekelegen salada quqyq buzýshylyqtyń aldyn alý júıesin qalyptastyrýǵa baǵyttalady. Sonymen birge, elimiz úshin osy maqsattaǵy zańnamanyń qabyldanýynyń mańyz zor. Óıtkeni, bul qujattarda azamattardyń konstıtýtsııada kózdelgen quqyqtary men bostandyqtaryn qorǵaýdy nyǵaıtý, quqyq buzýshylyqtyń aldyn alýdyń tolyq aýqymdy jáne tıimdi júıesin qalyptastyrý qarastyrylady. Sondaı-aq atqarýshy bılik, jergilikti ózin-ózi basqarý organdarynyń, quqyq qorǵaý organdarynyń, áleýmettik qorǵaý mekemeleriniń, qoǵamdyq birlestikter men azamattardyń ózara is-qımylyn jetildirý sharalary kózdeledi. Alǵash ret quqyq buzýshylyqtyń aldyn alýdyń kóp deńgeıli júıesin, ıaǵnı, aýqymy boıynsha arajigi ajyratylǵan jalpy aldyn alý, arnaıy jáne jeke júıesin qurýdy engizý usynylady», dedi jıynda sóz sóılegen Májilistiń Zańnama jáne sot-quqyqtyq reforma komıtetiniń tóraǵasy Rahmet Muqashev.
Esterińizge sala keteıik, atalǵan zań jobalary Parlament Májilisinde birinshi oqylymda talqylanyp, maquldanǵan bolatyn. Qazir qujattar ekinshi oqylymǵa ázirlenýde.
«Qazirgi ýaqytta otbasylyq-turmystyq qarym-qatynastar salasynda adamnyń jáne azamattyń konstıtýtsııalyq quqyqtaryn, bostandyqtary men múddelerin qorǵaýǵa baǵyttalǵan zańnamanyń qoldanystaǵy normalary júıesinde otbasynda jasalatyn zorlyq-zombylyq faktilerine qarsy is-qımyldyń quqyqtyq negizderi joq. Halyqaralyq tájirıbe kórsetkendeı, otbasylyq-turmystyq salada qalyptasyp otyrǵan qatynastardyń erekshelikteri men aıyrmashylyǵyna baılanysty otbasyndaǵy zorlyq-zombylyqty jeńý úshin ákimshilik nemese qylmystyq jazalardy qoldaný jetkiliksiz»,- dep atap kórsetilgen Úkimettiń turmystyq zorlyq-zombylyqqa qatysty jobaǵa bergen qorytyndysynda.
Dóńgelek ústeldegi máseleler negizinen eki sessııa boıynsha talqylanatyn bolady. Atap aıtqanda, onyń birinde qylmystyń aldyn alý salasyndaǵy halyqaralyq standarttar qaralsa, ekinshi bólimde Qazaqstandaǵy quqyq buzýshylyqtyń aldyn alý sharalary jaıynda sóz bolmaq.
Basqosý qorytyndysyna sáıkes, jıynǵa qatysýshylar zań jobalary boıynsha óz usynystaryn jasaıtyny kútilýde.
