Májiliste turǵyn úı saıasatyna qatysty usynys jasaldy
«Elimizde ár azamattyń áleýmettik jaǵdaıy baspanasynyń bolýymen baılanysty ekeni belgili. Respýblıkamyz boıynsha sońǵy jyldary bul másele edáýir kúrdelenip keledi. Jyldar boıy kezekte turǵan áleýmettik osal toptar sanatynyń ókilderi úı alý múmkindigine senimsizdik bildirýde. Mysaly, 2018 jyldan beri kezekte turǵan adamdardyń tizimi shamamen 130 myńǵa kóbeıip, 591 myń tirkelýshini qurap otyr. Onyń ishinde, olardyń sany Shymkentte 14 myńǵa ósip, 48 442 adam bolsa, Almaty oblysyndaǵy úı kezegin kútýshilerdiń sany 17 myńǵa ósip, 59 067-ge jetti. Al Túrkistan oblysynda kezektegi san 19 myńǵa artty. Bul tsıfrlar tek ósýmen bolsa, páter jaldaǵan otbasylar kóshýmen álek», - dedi E. Beısenbaev májilistiń jalpy otyrysynda.
Onyń aıtýynsha, 591 myńnan astam kezekte turǵan adamnyń 170 myńǵa jýyǵynyń jan basyna shaqqandaǵy tabysy kúnkóris deńgeıinen tómen, ıaǵnı kedeıshiliktiń shyńyraý sheginde ekeniniń dáleli. Aıta ketetini, bul sanattaǵy kópshilikti – І, ІІ toptaǵy múgedekter, erekshe balalardy asyraýshy otbasylar, jetimder, kópbalaly otbasylar quraıdy.
«Memleket basshysy 2020 jyldyń basyna deıin «Baqytty otbasy» baǵdarlamasynyń aýqymyn keńeıtýdi tapsyrǵan bolatyn. Al Úkimet bolsa, tek qarjyny ulǵaıtýmen shekteldi. Osy oraıda, áleýmettik osal toptarǵa kiretin jetimder men múgedekter sanaty qaıta syrtta qalyp qoıdy. Sonymen qatar, «Shańyraq» baǵdarlamasyna arnalǵan qarjy áli ortaq operatorǵa úılestirilmegen. Úkimet úshin bir aı ýaqyt emes shyǵar, al páter jaldaýshy úısiz otandasymyzǵa bul kezekti dalaǵa ketken páteraqysynyń somasy», - dedi depýtat.
Osy oraıda ol Úkimet tarapynan daıarlanyp jatqan «Turǵyn úı saıasaty» týraly zańnamanyń jobasyna tıisti usynystardy eskere kele, naqty sheshimder tizbegin qarastyrýdy surady.
