Májiliste turǵyn úı qunyn tómendetýge qatysty usynys aıtyldy
NUR-SULTAN. QazAqparat – Májilistiń jalpy otyrysynda depýtat Jambyl Ahmetbekov qurylys materıaldary baǵasyn retteýge qatysty usynys aıtty, dep habarlaıdy QazAqparat tilshisi.
Úkimet basshysynyń atyna joldanǵan depýtattyq saýalda Qazaqstan Respýblıkasynyń qurylys naryǵynda qurylys materıaldarynyń jappaı qymbattaýy baıqalyp otyrǵandyǵy, qurylys materıaldary qunynyń ósýi turǵyn úı qunynyń qymbattaýyna ákep soqqany atalyp ótken. Sáıkesinshe, bul memlekettik bıýdjet esebinen salynatyn mektepter, aýrýhanalar jáne basqa da áleýmettik obektiler qurylystarynyń da qymbattaýyna alyp keletini belgili.
J. Ahmetbekovtyń aıtýynsha, qazirgi kezde Qazaqstanda qurylys maýsymynyń bastalýy qarsańynda belgili bir salalarda kadrlar tapshylyǵy qalyptasty. Qurylys salasynda kadrlardyń jetispeýshiligi qatty sezilýde, eń aldymen, ártúrli jumysshylar, tas qalaýshylar, árleýshi-syrlaýshylar jáne t.b. mamandar jetispeıdi.
Kadr jetispeýshiliginiń negizgi sebepteriniń biri qurylys salasy men tehnıkalyq jáne kásibı bilim berý mekemeleriniń arasyndaǵy ózara baılanystardyń bolmaýynan bolyp otyr.
«Kóptegen kolledjder oqýshylardyń kásibı baǵdaryn shyńdamaıdy, olarǵa obektilerde kásibı praktıkadan ótý múmkinshilikterin jasamaıdy. Búgingi tańda Qazaqstan Qurylysshylar odaǵynyń aqparatyna qaraıtyn bolsaq, elimizdiń qurylys salasyna 242 000 maman jetispeıdi», - dedi depýtat.
Osyǵan baılanysty, eńbek naryǵyndaǵy jetispeýshilikti tolyqtyrý qajet jáne jumys berýshilerge qolda bar kadrlyq problemalardyń ornyn toltyrý úshin Qazaqstan Respýblıkasynyń Úkimeti myna máselelerdi qarastyrýy tıis:
- Qazaqstanda turǵyn úı qunynyń ósýin tejeý maqsatynda qurylys materıaldary naryǵynda baǵa belgileýdi rettep otyrý múmkindikterin izdestirý;
- Qyzmetkerlerdiń Qaǵıdalarynyń 5-sanatyna «sheteldikterdiń jáne azamattyǵy joq adamdardyń erekshe sanaty» - tómen bilikti nemese biliktiligi joq qyzmetkerler» degen tolyqtyrý engizý;
- Jumys berýshilerge qurylys-montaj jumystaryn júrgizý kezeńinde sheteldik qyzmetkerdi Qazaqstan aýmaǵynda bolý ýaqytyn jobanyń merzimine sáıkes ulǵaıtýyna múmkindik berý;
- Pılottyq jobany iske asyrý arqyly obektilerdi salý kezinde FIDIC qaǵıdattary men erejelerin engizý;
- Tehnıkalyq jáne kásibı bilim berý mekemelerindegi oqý protsesine óndiristik oqýlardy engizý jónindegi jáne oqýshylardyń óndiristik praktıkalardan ótýi men olardy dýaldyq oqytý prıntsıpterimen tolyqtyrý jónindegi jumystardy úılestirýdi qamtamasyz etý.
