Májiliste turǵyn úı qatynastaryna arnalǵan zań jobasy tanystyryldy
ASTANA. 25 qarasha. QazAqparat - Búgin Parlament Májilisinde «Qazaqstan Respýblıkasynyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» zań jobasynyń tanystyrylymy boldy.
Qujat boıynsha QR Óńirlik damý vıtse-mınıstri Serik Nokın baıandama jasady.
Atalǵan zań jobasy quqyq normalary arasyndaǵy qaıshylyqtardy, olqylyqtardy, kollızııalardy, sonymen birge sybaılas jemqorlyqqa yqpal etetin ártúrli normalardy anyqtaý men alyp tastaý maqsatynda ázirlengen. Bul rette zań jobasy turǵyn úı ınspektsııalarynyń qyzmetin zańnamalyq bazamen qamtamasyz etýdi, «tıimdi menshik júıesin» odan ári qalyptastyrýdy qarastyrady. Budan bólek, turǵyn úıge qoıylatyn sanıtarııalyq jáne tehnıkalyq talaptar bekitiletin bolady. Sonymen birge zań jobasynyń aıasynda arnaýly memlekettik organdar qyzmetkerleriniń turǵyn úıge quqyqtaryn iske asyrý tetigi jetildiriledi.
«Zań jobasyna sáıkes, Ákimshilik quqyq buzýshylyq týraly kodekske ózgerister engiziledi. Atap aıtqanda, kondomınıým nysanyn basqarý organdaryna eskertý berý túrindegi jaýapkershilikti qarastyrylatyn jańa ákimshilik quqyq buzýshylyq normasymen tolyqtyrylady. Budan bólek, turǵyn úı ınspektsııasynyń qaýlylary, uıǵarymdary men memlekettik turǵyn úı ınspektsııasynyń ózge de zańnamalyq talaptaryn oryndamaǵany úshin ákimshilik isterge qatysty quzyreti kózdeledi», deıdi S. Nokın.
