Májiliste turǵyn úı qatynastary boıynsha zańǵa engiziletin ózgerister tanystyryldy
ASTANA. Qyrkúıektiń 16-cy. QazAqparat /Qanat Mámetqazyuly/ - QR Parlamenti Májilisiniń Ekonomıkalyq reforma jáne óńirlik damý komıtetinde «Qazaqstan Respýblıkasynyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» zań jobasynyń tanystyrylymy bolyp ótti.
Atalǵan zań jobasy Memleket basshysynyń tapsyrmasyn oryndaý maqsatynda ázirlengen jáne memlekettik turǵyn úıge ıelik etý salasynda turǵyn úı zańnamasyn jetildirýge baǵyttalady. «Biz ótken jyly turǵyn úı qatynastaryna oraı qoldanystaǵy zańǵa birshama ózgerister engizgen bolatynbyz. Degenmen, búgingi talap qosymsha túzetýlerdi qajet etedi. Biz áli bunymen de toqtap qalmaımyz. Al búgingi zań jobasyna keletin bolsaq, qoldanystaǵy zańnamada memlekettik kommýnaldyq turǵyn úı qory men memlekettik kásiporyndardyń qaramaǵyndaǵy turǵyn úıler ǵana memlekettik turǵyn úı qorynyń quramynda bolýy kózdeledi. Sonymen bir mezgilde, ortalyq atqarýshy organdar men basqa memlekettik mekemelerdiń balansynda memleketke tıesili turǵyn úıler barshylyq. Alaıda, menshiktiń osy túri zańnamada kózdelmegen», - dedi Qurylys jáne turǵyn úı kommýnaldyq sharýashylyq isteri agenttigi tóraǵasynyń orynbasary Nıkolaı Tıhonıýk.
Budan bólek, tóraǵa orynbasarynyń aıtýynsha, jergilikti atqarýshy organdar beretin turǵyn úıler qyzmettik turǵyn úı nemese qyzmettik turǵyn úıge teńestirilgen turǵyn úı dep bólinedi. Bul rette olardyń quyqtyq mártebesinde eleýli aıyrmashylyqtar da belgilenip otyr. Sonymen birge, zań jobasy boıynsha memlekettik mekemelerdiń turǵyn úı qorynan qyzmettik turǵyn úı berý tártibi men sharttaryn naqtylaý, osyndaı úıdi jekeshelendirý tártibin anyqtaý, apatty úılerden azamattardy kóshirý problemasyn sheshý sharalary qarastyrylady. «Máselen, árbir mınıstrlikte óziniń turǵyn úı qoryn qurý usynylady. Jalpy, burynyraqta árbir mınıstrlikterde turǵyn úı qoryn ıelenetin memlekettik kásiporyn bolǵan. Bul kásiporyndardyń barlyǵy aktsıonerlik qoǵam bolyp quryldy da, turǵyn úı qory ákimdikterge berilgen edi. Endi osy qalpyna keltiriledi», dedi N. Tıhonıýk.
