Májiliste TMD aýmaǵyndaǵy eńbekshi-mıgranttar men olardyń otbasynyń quqyqtyq mártebesi týraly konventsııa talqylandy
ASTANA. Qarashanyń 3-i. QazAqparat /Qanat Mámetqazyuly/ - Búgin QR Parlamenti Májilisi Halyqaralyq ister, qorǵanys jáne qaýipsizdik komıtetiniń keńeıtilgen otyrysynda «Táýelsiz Memleketter dostastyǵyna qatysýshy memleketterdiń eńbekshi-mıgranttary men olardyń otbasy músheleriniń quqyqtyq mártebesi týraly konventsııany ratıfıkatsııalaý týraly» zań jobasy talqylandy,
dep habarlaıdy QazAqparat.
Atalǵan konventsııaǵa 2008 jylǵy qarashada Kıshıneý qalasynda qol qoıylǵan. Jalpy konventsııa erejeleri qabyldaýshy memleket aýmaǵynda turý ýaqyty kezeńinde eńbekshi-mıgranttar men olardyń otbasy músheleriniń negizgi quqyqtaryn retteýge baǵyttalady. Qujat eńbekshi-mıgranttar men olardyń otbasy múshelerine teń qaraı bilý normalaryn bekitedi. Atap aıtqanda, konventsııa boıynsha oǵan jatatyn sanattarǵa quldyq, kez-kelgen basqa da eriksiz jaǵdaılar, májbúrli eńbek pen qınaý, adamnyń ar-namysy men abyroıyna qatigezdikpen, kemsitýshilikpen qaraýǵa nemese jazalaý jaǵdaılaryna jol bermeý kózdeledi.
«Buǵan qosa, konventsııa quziretti organnan basqa eshkim eńbek-mıgranttary men onyń otbasy músheleriniń jeke basyn kýálandyratyn qujattary men elge kirýine, elde bolýyna nemese aqyly eńbek etýine qatysty qujattardy alyp qoımaıtynyna kepildik beredi. Atalǵan qujattardy joıýǵa, búldirýge jol berilmeıdi. Bul rette konventsııanyń maqsattarynyń biri eńbekshi-mıgranttardy zańsyz nemese qupııa jaldaýǵa jáne jasyryn ákelýge shek qoıý bolyp tabylady. Osyǵan oraı, zańsyz júrgen nemese qujaty joq mıgranttardy jumysqa qabyldaýǵa tyıym salynatyn bolady. Máselen, konventsııada eńbekshi mıgranttardy tartý jáne olardyń eńbegin paıdalaný salasynda taraptar ózara is-qımyl jasaý, olardy aqyly eńbek merzimi aıaqtalǵannan soń, sondaı-aq kóshi-qon zańnamasyn buzǵan jaǵdaıda qaıtarý jolymen barlyq yqtımal sharalardy qabyldaý qarastyrylady», - dedi Eńbek jáne halyqty áleýmettik qorǵaý vıtse-mınıstri Birjan Nurymbetov.
Onyń aıtýynsha, qujatta eńbekshi-mıgranttar týraly derekter qoryn qurý, TMD aıasynda kóshi-qonnyń osy sanaty boıynsha aqparat almasý sharalaryn qabyldaý týraly normalar da qamtylyp otyr. Vıtse-mınıstrdiń sózine qaraǵanda, zań jobasyn qabyldaý osy salada birqatar jaǵymdy jaǵdaılar qalyptastyrady. Máselen, qujat kúshine ense eńbekshi-mıgranttar men olardyń otbasy músheleriniń rettelgen quqyqtyq jaǵdaıy qamtamasyz etiledi. «Konventsııada bekitilgen quqyqtar men kepildikter resmı kelgen eńbekshi-mıgranttarǵa kózdelgendikten zańsyz kóshi-qon aǵymynyń tómendeýine, sondaı-aq TMD elderi aıasynda áleýmettik-ekonomıkalyq kirigý úderisteriniń tereńdeýine septigin tıgizedi. Bul shara ásirese shekara mańyndaǵy jurtshylyq úshin asa mańyzdy bolyp tabylady», dedi B. Nurymbetov.
Zań jobasy palatanyń aldaǵy ýaqyttaǵy jalpy otyrysyna shyǵarylatyn bolyp kelisildi.
