Májiliste TMD aýmaǵynda jalǵan taýar belgileriniń aldyn alý kelisimi ratıfıkatsııalandy

ASTANA. QazAqparat – Májilis TMD elderiniń jalǵan taýar belgileri men geografııalyq kórsetkishterdi paıdalanýdyń aldyn alý yntymaqtastyǵy týraly kelisimdi ratıfıkatsııalady, dep habarlaıdy QazAqparat tilshisi.

QR Ádilet mınıstri Azamat Esqaraev «TMD-ǵa qatysýshy memleketterdiń jalǵan taýar belgilerin jáne geografııalyq kórsetkishterdi paıdalanýdyń aldyn alý men jolyn kesý jónindegi yntymaqtastyǵy týraly kelisimdi ratıfıkatsııalaý týraly» zań jobasyn tanystyrdy.

«Kelisimniń maqsaty – taraptarǵa jalǵan belgiler jáne geografııalyq kórsetkishter jazylǵan taýarlardy óndirý jáne ótkizý faktileriniń aldyn alý, anyqtaý jáne jolyn kesý, sondaı-aq osyndaı taýarlardy TMD-ǵa qatysýshy memleketterdiń memlekettik shekaralary arqyly ótkizý faktileriniń aldyn alý, anyqtaý jáne jolyn kesý máseleleri boıynsha yntymaqtastyqty júzege asyrýǵa múmkindik beretin jaǵdaılar jasaý. 1999 jylǵy 4 maýsymdaǵy qoldanystaǵy kelisimniń erejeleri jańartyldy, ol osy kelisim kúshine engen kúnnen bastap qoldanysyn toqtatady», - dedi Ádilet mınıstri Májilistiń búgingi otyrysynda.

Atap aıtqanda, TMD-ǵa qatysýshy keıbir memleketterdiń Dúnıejúzilik saýda uıymyna qosylýyna baılanysty taraptardyń mindettemelerin kózdeıtin normalar engizildi.

Atalǵan qujatta jalǵan taýar belgileri men geografııalyq kórsetkishteri bar taýarlardy óndirý men ótkizý týraly anyqtalǵan faktiler men aqparat almasý, zııatkerlik menshik quqyqtaryn qorǵaý men saqtaý salasynda kadr daıyndaý, olardyń biliktiligin arttyrý jónindegi birlesken is-sharalar kózdelgen.

«Bul kelisim taraptardyń taýardyń shyǵarylǵan jeri men sıpattaryna qatysty jańylystyrýy múmkin taýarlardy belgileý jáne tanystyrý kezinde kez kelgen quraldardy paıdalanýdy boldyrmaý, josyqsyz básekege jol bermeý jóninde quqyq qorǵaý quraldaryn qoldaný boıynsha mindettemelerin belgileıdi. Kelisim taraptarynyń ózara is-qımylyn úılestirý TMD elderi sheńberindegi zııatkerlik menshikti qorǵaý jáne saqtaý máseleleri jónindegi memleketaralyq keńeske júktelgen. Taraptar yntymaqtastyqty ózderiniń ýákiletti organdary arqyly júzege asyrady», - dedi Azamat Esqaraev.

Kelisimge 2021 jyly 28 mamyrda TMD Úkimet basshylary keńesiniń otyrysynda 8 memleket qol qoıdy. Qazirgi ýaqytta memleketishilik rásimderdi Armenııa, Belarýs, Qyrǵyzstan, Ózbekstan júrgizdi.

Kelisimdi ratıfıkatsııalaý týraly zańnyń qabyldanýy teris quqyqtyq, áleýmettik-ekonomıkalyq jáne ekologııalyq saldarǵa ákep soqpaıdy, respýblıkalyq bıýdjetten qosymsha shyǵyn talap etpeıdi.

Nátıjesinde otyrysqa qatysyp otyrǵan 97 depýtattyń 94-i zań jobasyn jaqtap daýys berdi.