Májiliste temeki ónimine aktsızderdi úılestirýge arnalǵan qujat maquldandy
NUR-SULTAN. QazAqparat – Parlament Májilisiniń jalpy otyrysynda «Eýrazııalyq ekonomıkalyq odaqqa múshe memleketterdiń temeki ónimderine aktsızder salasyndaǵy salyq saıasatyn júrgizý qaǵıdattary týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.
«Kelisim jobasynda 2024 jyldan bastap ındıkatıvtik mólsherleme men odan aýytqý dıapazondaryn qoldaný kózdelip otyr. Eýrazııalyq ekonomıkalyq komıssııa Keńesine aktsızderdiń ındıkatıvtik mólsherlemelerin bekitý jáne negizdelgen ekonomıkalyq oryndylyǵy bolǵan jaǵdaıda olardy ózgertý boıynsha ókilettikter berý kózdeledi. Aktsızder mólsherlemelerin jaqyndastyrý 2024 jyldan bastap júzege asyrylatyn bolady», - dedi QR Ulttyq ekonomıka mınıstri Áset Erǵalıev.
Onyń aıtýynsha, árbir bes jyl saıyn biryńǵaı ındıkatıvtik mólsherleme jáne odan aýytqý dıapazony belgilenedi.
«2024 jyly sıgaretterge qatysty ındıkatıvtik mólsherleme 1000 dana úshin 35 eýroǵa balamaly mólsherde ulttyq valıýtada belgilengen», - dedi mınıstr.
«Zań jobasy teris áleýmettik-ekonomıkalyq jáne quqyqtyq saldarǵa ákep soqpaıdy. Budan basqa, Zań jobasy temeki ónimderine arnalǵan aktsız mólsherlemeleriniń ulǵaıýy esebinen bıýdjetke qosymsha túsimdi qamtamasyz etedi. Osylaısha, Kelisim Eýrazııalyq ekonomıkalyq odaqqa múshe memleketterdiń aýmaǵynda temeki ónimderiniń aktsızderin salý salasynda biryńǵaı praktıka qoldanýdy qamtamasyz etýge múmkindik beredi», - dedi Á. Erǵalıev.
