Májiliste tehnıkalyq retteý jáne metrologııa máselelerin qamtyǵan zań jobasy talqyǵa tústi
ASTANA. 3 mamyr. QazAqparat - Búgin Májiliste Ekonomıkalyq reforma jáne óńirlik damý komıtetiniń uıymdastyrýymen «Qazaqstan Respýblıkasynyń keıbir zańnamalyq aktilerine tehnıkalyq retteý jáne metrologııa máseleleri boıynsha ózgerister
men tolyqtyrýlar engizý týraly» zań jobasy talqyǵa tústi. Qujat buǵan deıin palatanyń jalpy otyrysynda birinishi oqylymda maquldanǵan bolatyn.
Esterińizge sala keteıik, atalǵan zań jobasy tehnıkalyq retteý salasyndaǵy ulttyq zańnamany Eýrazııalyq ekonomıkalyq qoǵamdastyqtyń Memleketaralyq keńesiniń 2009 jylǵy 11 jeltoqsanyndaǵy sheshimimen qabyldanǵan Halyqaralyq sharttarǵa sáıkestendirýdi kózdeıdi. Budan bólek, Dúnıejúzilik saýda uıymynyń saýdadaǵy tehnıkalyq kedergiler jónindegi kelisiminde belgilengen halyqaralyq termınologııaǵa qoldanystaǵy zań normalary sáıkestendiriledi. Osy maqsatta birqatar qujattarǵa ózgerister engizilip otyr. Atap aıtqanda, tehnıkalyq retteý jáne ólshem birligin qamtamasyz etý salasyndaǵy zańnamany buzǵandyǵy úshin ákimshilik jaýapkershiliktiń arajigin ajyratý jáne ony kúsheıtý normalary engiziledi. Budan basqa, tehnıkalyq reglamentter, standarttar jáne normatıvtik-tehnıkalyq qujattar salasyndaǵy biryńǵaı memlekettik qor qurý qarastyrylady. Standarttar ázirleý jónindegi jumystardy ǵylymı-zertteý jumystaryna jatqyzý jáne ólshem quraldaryn jóndeý ári jasaý quqyǵyn alý úshin lıtsenzııalaýdaǵy mindettiligi joıylatyn bolady.
Jıyn barysynda zań jobasy boıynsha jumys tobynyń jetekshisi Elena Tarasenko EýrAzEQ PA kezekti otyrysy jaqyn aralyqta Sankt-Peterborda ótetini josparlanǵanyn atap ótti. Ol basqosýda da zańnamalyq úılesim máselesi talqylanatyn bolady. «Biz qazirdiń ózinde EýrAzEQ sheńberindegi Qazaqstan tarapynyń atqarǵan jumystary tolyqqandy aqparat bere alamyz», - dedi E.Tarasenko.
