Májiliste tehnıkalyq qyzmetkerlerdiń jalaqysyn kóterý máselesi qaraldy

NUR-SULTAN. QazAqparat – Májilis depýtaty Maqsat Ramanqulov tehnıkalyq qyzmetkerlerdiń jalaqysyn kóterý máselesin kóterdi. Osy oraıda QR Premer-Mınıstriniń orynbasary Eraly Toǵjanovtyń atyna depýtattyq saýal joldady, dep habarlaıdy QazAqparat tilshisi.

«Memleket áleýmettik salaǵa jiti nazar aýdaryp keledi, bul ásirese pandemııa kezinde aıqyn kórinis tapty. Pandemııa kezinde «Pedagog mártebesi týraly» zań qabyldanyp, dárigerlerge qosymsha tólemder engizildi. Jyl saıyn muǵalimder men dárigerlerdiń jalaqysy 20-30 paıyzǵa artyp keledi. Munyń bári óte oryndy, biz rızashylyǵymyzdy bildiremiz jáne osyndaı kózqarasty árdaıym qoldaımyz. «Aq jol» partııasyna osy sektorlardyń qatardaǵy qyzmetkerleri, ıaǵnı sanıtarlar, assıstentter, eden jýýshylar, jedel járdem júrgizýshileri, murajaı, óner, mektep, balabaqsha, kitaphana, muraǵat salasyndaǵy ózge de qyzmetkerler olardyń áriptesteri úshin memleket jyl saıyn jalaqyny kóbeıtse, al sol salalardaǵy tehnıkalyq qyzmetkerlerdiń jalaqysy qatarynan kóptegen jyldar boıy ózgerissiz qalady degen shaǵymdarmen jıi júginedi», - dep toqtaldy depýtat Májilistiń jalpy otyrysynda.

Onyń aıtýynsha, keıbir jerde jedel járdem júrgizýshileriniń jalaqysy - shamamen 70-75 myń teńge jáne 5 jyldan astam ýaqyt boıy joǵarylaǵan joq. Mektepter men balabaqshalardyń tehnıkalyq qyzmetkerleriniń jalaqysy – shamamen 50 myń teńge.

«Sonymen qatar, ınflıatsııanyń ekonomıkalyq sıpatyn eshkim joıǵan joq, memlekettik organdar taýarlar men azyq-túlik baǵasynyń ósýin aıtpaǵannyń ózinde, turǵyn úı kommýnaldyq sharýashylyǵyndaǵy monopolısterdiń tarıfterin ulǵaıtýǵa únemi kelisedi. Bizdiń azamattarymyzdyń bul sanaty tipti ıpoteka boıynsha turǵyn úıge qol jetkize almaıdy jáne ondaǵan jyldar boıy jaldamaly páterlerde turady. Jalaqylaryna durys kıine almaıdy, balalaryn asyraı almaıdy, kúndelikti máselelerdi sheshe almaıdy. Osyndaı jalaqyǵa qalaı ómir súrsin?», - dedi Maqsat Ramanqulov.

Osyǵan baılanysty «Aq jol» fraktsııasy áleýmettik saladaǵy jalaqyny kóterý kezinde bir mezgilde tehnıkalyq qyzmetkerlerdiń eńbekaqysyn kóterý qajet dep esepteıdi.

«Sondyqtan biz áleýmettik salanyń kómekshi jáne tehnıkalyq qyzmetkerlerine qatysty ádilettilik tanytýdy, jalaqyny kóterý kezinde olardy nazardan tys qaldyrmaýdy suraımyz. Joǵaryda aıtylǵandarǵa baılanysty, «Aq jol» depýtattyq fraktsııasy aıtylǵan máselege nazar aýdarýdy qajet dep esepteıdi jáne atalǵan sanattaǵy qyzmetkerlerdi laıyqty tabys deńgeıimen qamtamasyz etý múmkindigin qaraýyńyzdy suraıdy», - dedi depýtat.