Májiliste tatýlastyrý rásimderin qoldaný salasyn keńeıtetin qujat maquldandy

Qazaqstan Respýblıkasy Parlamentiniń depýtattary bastamashy bolǵan zań jobasy daýdy (janjaldy) sheshýdiń sottan tys tártibin, onyń ishinde tatýlastyrý rásimderin paıdalana otyryp damytý maqsatynda ázirlendi.
Zańnama jáne sot-quqyqtyq reforma komıtetiniń málimetinshe, tatýlastyrý rásimderin qoldaný salasyn keńeıtý, azamattardyń sot shyǵystaryn barynsha azaıtý, sondaı-aq daýdy (janjaldy) sottan tys retteýge halyqtyń múddeliligin anyqtaý zań jobasynyń mindetteri bolyp otyr.
Zań jobasymen medıatorlar uıymynyń negizgi fýnktsııalaryn jáne ýákiletti organnyń quzyretin aıqyndaıtyn túzetýler engiziledi.
Medıatsııany qoldaný múmkindigin keńeıtý maqsatynda onlaın-medıatsııany damytýǵa baǵyttalǵan túzetýler usynylady.
Zań jobasymen jumys barysynda depýtattar Azamattyq protsestik kodekske taraptarǵa eksaýmaqtyq sottylyqty tańdaý quqyǵyn beretin túzetýler engizdi. Sondaı-aq azamattyq protseske «sotqa deıingi hattama» degen jańa ınstıtýt engiziledi, ol taraptarǵa sotta tabysqa jetý múmkindigin baǵalaýǵa jáne osyǵan baılanysty daýdy sotqa deıingi tártippen retteý múmkindigin jáne basqa da birqatar túzetýlerdi paıdalanýǵa múmkindik beredi.
Budan basqa, komıtetter men depýtattar engizgen ózgerister men tolyqtyrýlar zań jobasyn zań tehnıkasy qaǵıdalaryna sáıkes keltirýge baǵyttalǵan jáne redaktsııalyq-naqtylaý sıpatyna ıe.
Atalǵan qujat bıyl qarasha aıynyń baıasynda Parlament Májilisiniń jalpy otyrysynda birinshi oqylymda maquldanǵan bolatyn.