Májiliste sot rásimderin qysqartýǵa arnalǵan zań jobasy tanystyryldy

NUR-SULTAN. QazAqparat – Parlament Májilisinde «QR Azamattyq protsestik kodeksine sottar jumysynyń zamanaýı formattaryn endirý, artyq sot rásimderi men shyǵyndaryn qysqartý máseleleri boıynsha ózgerister men tolyqtyrýlar engizý týraly» zań jobasy tanystyryldy, dep habarlaıdy QazAqparat tilshisi.

«Basty maqsat – protsesti ońtaılandyrý, ony zamanaýı etý. Negizgi basymdyq – bizdiń azamattar jáne zańdy tulǵalardyń quqyqtary men zańdy múddeleri. Olar qandaı jaǵdaıda bolmasyn japa shekpeýi kerek. Atalǵan túzetýlerdi daıyndaý kezinde negizgi mindetimiz osy boldy», - dedi QR Joǵarǵy sotynyń azamattyq ister jónindegi sot alqasynyń tóraǵasy Meırambek Taımerdenov.

Osy oraıda ol atqarylatyn úsh baǵytty atap ótti. Birinshisi – sýdıanyń jáne sot isine basqa da qatysýshylar jumysynyń zamanaýı formaty. Ekinshisi – azamattyq protsesti ońtaılandyrý. Úshinshisi – sot isin júrgizýdi tsıfrlandyrý.

Atap aıtqanda, birinshi blok boıynsha sýdıanyń protsestegi rólin túbegeıli ózgertý usynylǵan.

«Búginde sýdıa taraptardyń ustanymdaryna, usynylǵan dáleldemelerge táýeldi. Bul turǵyda shyndyqty anyqtaý jaǵy aqsaıdy. Osynyń saldarynan sot júıesine, sot tóreligine, memleketke degen senimge nuqsan keltiriledi. Biz ne aıtqymyz keledi? Taraptardyń jaryspalylyq jáne teń quqylyq qaǵıdatyn eshkim joqqa shyǵarmaıdy. Alaıda onyń orynsyz qoldanylýyna da jol bermeý kerek. Qaǵıdattar quqyq sýbektileriniń múddelerin qorǵaýǵa jumys isteýi kerek, ıaǵnı talap qoıýshynyń da, jaýapkerdiń de», - dedi Meırambek Taımerdenov.