Májiliste saıası partııalardyń ótý shegin tómendetýge qatysty zań jobasy qaralady
«Atalǵan Konstıtýtsııalyq zań jobasy Memleket basshysynyń 2020 jylǵy qyrkúıektegi Joldaýyn, sondaı-aq Parlamenttiń aǵymdaǵy sessııasynyń ashylýynda berilgen tapsyrmasyn oryndaý maqsatynda ázirlendi. Zań jobasy aıasynda «Qazaqstan Respýblıkasyndaǵy saılaý týraly» Konstıtýtsııalyq Zańǵa jergilikti ákimderdi tikeleı saılaýdy taǵaıyndaý, ol kandıdattarǵa qoıylatyn talaptar, kandıdattardy usyný tártibi, ózin-ózi usynǵan kandıttardy qoldaý úshin qol jınaý tártibi, kandıdattardy tirkeý, saılaý kezindegi daýystardy sanaý, saılaý qorytyndylaryn belgileý jáne jarııalaý tártibi, saılaý ótkennen keıin saılanǵan ákimdi tirkeý boıynsha birqatar túzetýler kózdeledi», - dedi Májilistiń Zańnama jáne sot-quqyqtyq reforma komıtetiniń tóraǵasy Qanat Mýsın palatanyń jalpy otyrysynda.
Onyń aıtýynsha, zań jobasynda Parlament Májilisine saılaý kezindegi saıası partııalardyń ótý shegin 7 paıyzdan 5 paıyzǵa deıin tómendetý, «bárine qarsymyn» degen jazýy bar baǵandy barlyq deńgeılerdegi saılaý bıýlletenderine qosý týraly ózgerister men tolyqtyrýlar engiziledi.
«Zań jobasynda jergilikti ákimder saılaýyna saıası partııalar kandıdattardy usynýy kózdeledi. Budan basqa, tıisti aýdandyq mańyzy bar qalalar, aýyldar, kentter, aýyldyq okrýgter turǵyndarynyń passıvti saılaý quqyqtaryn iske asyrý maqsatynda zań jobasynda ózin-ózi ákimder saılaýyna usynýǵa múmkindik qarastyrylǵan. Ákimdikke halyq usynatyn kandıdat ózin qoldaýy úshin tıisti qol sanyn jınaıdy. Komıtet zań jobasyn qarap, qorytyndy ázirleýge daıyn», - dedi Q. Mýsın.
Sonymen qatar Májilis «Qazaqstan Respýblıkasynyń keıbir zańnamalyq aktilerine saılaý máseleleri boıynsha ózgerister men tolyqtyrýlar engizý týraly» ilispe zań jobasyn da qaraıtyn bolady.
Zań jobasymen «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly», «Qazaqstan Respýblıkasynyń memlekettik qyzmeti týraly» jáne «Saıası partııalar týraly» zańdarǵa túzetýler kózdeledi.
«Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» Zańda jergilikti ákimderiniń tártiptik teris qylyqtar jasaǵany úshin jaýaptylyǵyn qaraý bóliginde aýdandar (oblystyq mańyzy bar qalalar) máslıhattarynyń quzyretin tolyqtyrý usynylady. Sondaı-aq jergilikti ákim laýazymyna saılaýdyń jáne ókilettikterin toqtatýdyń jańa tártibi aıqyndaldy.
«Sonymen qatar, «Qazaqstan Respýblıkasynyń memlekettik qyzmeti týraly» Zańǵa saılanatyn ákimder úshin attestattaý men rotatsııalaýdy alyp tastaý jáne arnaıy tekseristen ótkizýdiń jańa tártibin engizý bóliginde túzetýler engiziledi. «Saıası partııalar týraly» Zańǵa jergilikti ákimdi saılaýǵa saıası partııalardan kandıdattardy usyný jóninde normalar qarastyrylǵan. Komıtet zań jobasyn qarap, qorytyndy ázirleýge daıyn», - dedi Qanat Mýsın.
